Press Council-i Assam Rifles dang kuli meshir

New Delhi, November 19: Assam Rifles (AR) purtemi Nagaland nung osangkaket adokertem dang NSCN-K teloki tangar amokmerena züluba aser saru meshiba osangtem madoktsütsüla ta ozüng agütsüba anema Naga nunger yimozülurtemi nokdakba angashia, Press Council of India (PCI)-i Assam Rifles dang iba kuliji meshia tasüngdangba yokogo.
PCI-isa Nagaland Chief Secretary danga iba maparen nung tejangja osang agütsütsü asoshi metetdaktsüogo. Assam Rifles-i October 25, 2015 nü “Unlawful Activities (Prevention) Act, 1967” nung ajemdaker osangtsüsang sadema magütsütettsüsa yimozülurtem dangi zülubaji kechiba züluar kuli meshia PCI-i tanü sangdong ka ajanga metetdaktsüogo.
PCI mendenbuba, Justice Chandramauli Kumar Prasad-i Director General, Assam Rifles dangi züluba shiti ka nung, iba ama yimozülurtem nem ozüng agütsütsüsa akümba kuli aser tensa tia aser nüngdak indangji metetdakjang ta shia lir. Ano, kasa osangji yaktasa agüjang ta PCI-i Chief Secretary Nagaland danga shia lir.
Ano, Editors Guild of India telokia Assam Rifles-i Nagaland nung yimozülurtem dang NSCN-K teloki agütsüba osang madoktsütsü ozüng agütsübaji lendong mapa ka lir ta aija metetdaktsüogo.
Ajisüaka, yashi Assam Rifles purtemi sangdongba osang ka nung, parnoki yimozülurtem dang osangtsüsang sadema mesangdongtsüsa kecha ozüng magütsü ta metetdakja liasü.
Assam Rifles purtemi October 25 nung yimozülurtem dangi züluba shidi nung NSCN-K teloki tangar amokmerenba aser tashiyim agi saru saruba osangtem adoktsübaji parnok yariba mapa ka asütsü, anungji ozüng raksar akümtsü ta shia lir.
Assam Rifles purtemi agütsüba ozüngji anema, Nagaland nung yimozülurtemi November 15 nü sangdong ka nung parnoki iba ozüng kübokji melitettsü ta metetdakja liasü.
Nagaland nung yimozülurtemi Assam Rifles purtemi agütsüba ozüng anema nokdakbaji pu sema yakanü International Federation of Journalists (IFJ) telokia metetdakja liasü. Parnoki Assam Rifles dang yimozülurtem nem ozüng agüja alibaji meyipa agitsüla ta takhangba agüja liasü.