Prince George küm 2 ajungba tenüng nung noksa ka sayu

London, July 22 (Agencies): Prince George sor küm ana ajungba anogo amungtsü lia anogo ka jakdang pa indang noksa tasen ka sayaogo.
Iba noksa nung Prince George ji Duke of Cambridge, William-i ajunger lir aser iba noksa ya alima nung nüngtugu photographer Mario Testino-i tangokba lir.
“Iba noksa ajanga Duke aser Duchess den par kibong pelaba mapang sayur. Prince George küm ana ajungba tenüng nung par kibongi iba noksa lemateper,” ta Kensington Palace sangdong ka ajanga metetdaktsü.
Alima nung nüngtugu fashion photographer Testino-i official noksa kar agiba rongnung iba ya ka lir. July 5, 2015 nü Princess Charlotte tzüsenba sülen nungi tang tashi noksa kar agia arudar. Prince George aser tebu na indang noksaji Sandringham House atsü nung agiba lir.
Iba noksa ya Kensington Palace indang Twitter aser Instagram account tem ajanga yimjak nung sayuogo.
Kensington Palace-isa ashiba agi Prince George indang tasoba anogomungji kibong sasep nung dang amungtsü.
Testino ya Peru nunger photographer ka lir aser 1997 küm asür Princess Diana-i Vanity Fair atema la noksa tangoktsü shim. Paisa Prince William o Prince Harry na tebu Prince Charles den külemi noksa agiogo.
“Princess Charlotte tzüsenba mapang noksa agitsü shimba atema kanga pelar aser iba ya maongka ulura lir. Iba linük indang Chubar kibong otsü indang noksa agitsü shimba atema kanga pelar. Iba linüki kü nem aika moatsüogo,” ta tan July ita tetenzüklen Testino-i Instagram ajanga pelaba osang metetdaktsü.