Prince Harry aser Meghan Markle na Engage süogo

London, November 27 (Agencies): Britain Prince Harry aser pa tetong US actress Meghan Markle na engage süogo, aser 2018 spring mapang kibong akümtsü, ta tebu Prince Charles-i sangodng ka ajanga metetdaktsüogo.
Arishiküm 33 tain Harry ya British chuba menden atsüngtsüpur rongnung jenjang pongububa nung lir, aser arishi küm 36 tain Markle ya US TV legal drama Suits nung shilem agiba ajanga nisung ajaki tali jangjaa aküm.Tena iba ita tetenzük nung engage asü, ta Clarence House nungi sangdong ka ajanga metetdaktsü.
“Prince Harry-i Chubatsür aser par kinungertem rongnung tanapurtem nem iba osang agütsüogo. Maneni Prince Harry-i Markle’er tsürapur tem nungi temoatsü meshiogo,” ta kasa sangdong ajanga metetdaktsü.
Tena ya medemertemi metetpelaba sülen 2016 küm July ita ajurutep.
Osang benertemi Markle private taküm kanga jangjung tenzükba sülen iba atema telangzüba agüja Harry-i tena tesendaktep aliba ita ka sülen sangdonga liasü, saka September ita nungaang Toronto nung Invictus Games ka asayaba reprangtsü asoshi tena külemi nüburtemi nuga temai adok.
“Onok ajak Meghan o Harry na atema kanga pelateper. Ozü jala ya kanga dang temeim aketba nisung ka lir, aser la den jakla liro nung kanga mesüktepa nisung Harry den longjemba atema tsürapur ka ama onok atema iba ya kanga dang tepela mapang ka lir,” ta lar tsürapur Thomas Markle aser Doria Ragland nati ashi.