Prince Harry-i Nepal nüburtem nem tetushi agütsür

Britain chubachir, Prince Harry (Tiyongtsü)-i Nepal yimtiba, Kathmandu tezülen, Patan Durbar Square nung tentetba heritage tesemtem semdangdang agiba noksa ka yangi angur. (Kathmandu, March 20)

Kathmandu, March 20 (Agencies): Britain chubachir, Prince Harry-i Nepal nüburtem nem tetushi agütsüba olen ka tanü, Deobar nü metetdaktsüogo.
Nepal nüburtemi yaküm menoknok lendong tulu ajuruba sülena parnoki temulungtetba tulu yur aki ama taküm junga aliba ngüa, Harry-i Nepal nüburtem tushia liasü.
Tan mezüngsüa Nepal semdangsang, Harry-i Nepal Tir, Bidya Devi Bhandri den lar kidang, Sheetal Niwas nung ajurutepa menoknok lendong atalokba sülen Nepal tajungba küma yanglushitsü onük benokba osang jangjaogo.
Britain aser Nepal na tsüngda tesendaktep junga ayu tenzüker küm 200 buba ajungba mapang nung arishi küm 31 tain Harry-i tan Nepal semdanger lir.
Yaküm Nepal nung menoknok lendong tesashi atalokba sülen ishiba agi nisung 9000 shi asüba osang tanü tashi nung bushiteta lir.
“Nepal linüki alima ajunga den shishilembatsü renema lir ta shia, alima ajungai Nepal semdangtsü osang ni prokshitsü nangzüker,” ta Harry-i lemsatepa liasü.
Harry aser Bhandari nati menoknok agi bener arutsüba teraksa tia tanaben tajungba küma yanglushitsü, raliwalirtem Nepal semdangdaktsütsü aser alima tsüngsang mupong balaka küma melenshibaren tajungba kümdaktsütsü densema, tongti onük aika benoka jembi.
Harry-i tesülen Nepal chuba ki, Patan Durbar Square semdangba den külemi, Nepal nung tentetba UNESCO World Heritage Site, Taleju Mandir, Krishna Mandir aser Char Narayan Mandir nunger  semdanga liasü.
Pai yashi, Honibar nüa Nepal Ato Kilonser, KP Sharma Oli den ajurutepa par linük anati maneni amalitepa alitsü onük benokba osang jangjaogo.
Ano, Britain mitkar rong nung Gorkha mitkartemi tongti shilem agiba atema pelaba olen ka Harry-isa metetdaktsüogo.