Prince mang rongogo; mitsü miima dang ayutsü

Los Angeles, April 24 (Agencies): Nüngtugu kentener Prince den nija asüpila sentong ka agiba sülen pa mang rongogo.
Asür Prince atema otongdar, Yvette Noel-Schure-i ashiba agi, par kinünger, medemer aser külen kentenertem April 23 nikongtsütsü asüpila sentong nung aden.
“Pa meimba kinungertem, medemertem aser külem kentenertemi Prince nem tetushi agütsüogo” ta Noel-Schure-i ashi.
“Prince tasümang rongogo aser iba mitsü ayuba tesemji yimjak nung memetetdaktsüi miimbanga dang ayutsü. Par kibong aser medemertem tesünep angutsü atema nenoki sarasademjangma” ta Noel-isa metetdaktsü.
“Pa asüba kuli ano menguteti lir aser hopta pezü shi ka nungang osangji angutsü imlar. Asür Prince nem tetushi agütsüba kenten sentong ka agitsü aser iba anogoji onoki metetdaktsütsü” ta laisa shisem.
Iba dak alia Noel-i osang tanga kecha memetetdaktsü saka asür Prince den asüpila sentongji Paisley Park, Chanhassen, Minnesota nung agi alitsü akok ta bilemer.
Asür Prince’er studio nung bass guitar atemsang, Larry Graham den Prince tenu Tyka Nelson aser kinungbo Maurice Phillips na angu.
Hokolbarnü Prince mang rangsaa tendangba mapa tembangobo aser Medical Examiner’s Office nungi ketdangser kati ashi agi, pa mang nung timtemba aser soseta asüba indang tachitettsü kecha maliasü.
Hopta ishika sülen ang toxicology tests agiba osang angutsü, ta paisa ashi.
Taoba Brihostibarnü Minneapolis nung par Paisley Park estate nung Prince ajungbena asü. Pa arishi küm 57 liasü.