Prince William aser Princess Catherine nati Kaziranga semdanger

Mongulbarnü Prince William aser Princess Catherine na Assam kübok Tezpur Airport tonga aruba sülen Assam Chief Minister-i anir ketdangsertemi tena pela agizükdang tangokba noksa ka angur.

Guwahati (Assam), April 12 (Agencies): British nunger tamarener kibong nungi Duke aser Duchess of Cambridge, Prince William aser Princess Catherine nati anogo ananü Assam nung UNESCO World Heritage Site Kaziranga National Park semdangtsü atema tanü Assam tonga aruogo.
Tena tanü nikongdang 6:15 ako meta tayimtsü ka ajanga Tezpur airport tonga arudang Assam Chief minister, Tarun Gogoi aser pa kinüngtsü, Dolly na den tongtibang nisungtemi Assam nunger sobaliba sempettem agi tena agizüka liasü.
Prince William aser Princess Catherine na tayimtsü nungi aludang Bihu, Jhumoor aser Bagurumba tsüngsang densema Assam sobaliba tsüngsang balala agi tena agizük.
Airport lobby nung parnok nem Assamese nunger chiyungtsütem den tanga chiyungtsütem agütsü.
Catherine tanen sentsü frock aser Prince William suit tanak semer airport nungi gari ka nung aodang tena agizüktsü atema sobaliba süoshi semer ataa aliba school tanurtem dak tenati teka ayiploktsü.
Tena taonung Diphlu River Lodge, Kaziranga nung yipzüktsü aser asüng, April 13 nü tena Jeep Safari nung Park nung aliba Bagori len ghonda ana sema senzüba sülen Park nung tongti ketdangsertem den sensaksemtsü.
Indian Wildlife Protection Act 1972 kübok Schedule 1 wild animal, tezü ka aketba güntok aliba ajanga Kaziranga National Park ya alima nung nüngtugu lir.
Tenatisa New Ram Terang yim semdangtsü. Shiti lenmang lapoktsütsü atema Prince William-i nungitba Mark Shand Foundation-i iba yim tesem belenshija liasü.