Princess Diana indang kürakyanglu ka yanglutsü

London, January 28 (Agenciers) : Asür Princess Diana indang kürakyanglu ka Kensington Palace indang atsü nung yanglutsü temelaba agütsüogo, ta Honibarnü Prince William aser Prince Harry nati metetdaktsü.
Tetsü, Princess Diana sür küm 20 ajunga nüngtem nung la indang kürakyanglu ka yanglutsü, ta jabaso anati ashi.
Lai akümlidang linük atema mapa tajung inyaktsüba atema tenüngsang agütsütsüji tang mapang kanga tetemsü, ta Kensington Palace sangdong ka ajanga metetdaktsü.
“Onoki meimla ketsüi nisung aika mulungjang nung kongshiogo. La indang kürakyanglu ajanga Kensington Palace semdanger ajaki la akümlidang mapa tajung inyaktetba bilemtettsü,” ta sangdong nungji shia lir.
Iba kürakyanglu yanglutsü asoshi sen bendentsü atema adianu anati committee ka tentetdaktsüogo aser iba committee jagi kürak yanglu yanglutsü asoshi nisunga bushitsü. Iba mapa memunui tenzüka inyaktsü aser ibaji kechi koma ka yanglutsü iba osangji khen lirang metetdaktsütsü, ta kasa sangdong ajanga ashi.
Sangdong nung ashiba agi, 2017 küm tatemlenbosa iba kürak yanglu renema sayatsü.
Princess Diana ya August 31, 1997 küm gari tsükoka asü.