Princess Eugine o Jack Brooksbank na kibong kümogo

Mongputeni/October 12 (Agencies): Windsor, England nung Windsor Castle kübok St. George’s Chapel nung Rogonü/Friday Princess Eugenie of York aser Jack Brooksbank na kiyimba sentong agiogo.
Iba kiyir benjung agiba mapang kiyimla Princess Eugine-i, London nung amenoka aliba Peter Pilotto, pai arrtsüba ‘ivory satin gown’ ka semok. Gown nungji cold-shoulder neckline, sleeve talang aser sweeping train keta lir. Eugine-i la kolak nung veil mekalok, saka iba melena lai tetsü, Queen Elizabeth II indang emerald aketba tiara ka ang kaloker liasü. Lai amshiba emerald tiara den puteptsü asoshi emerald agi yangluba küri (earring) ji la kinungbo Brooksbank-i sempet ama agüja liasü.
Iba kiyir benjung sentong nung Prince William aser Kate Middleton na densema tamarener kibongtem aruagi dena liasü.
Eugine o Brooksbank na kiyimba sentong nungsa tanga tamarenertem rongnung Queen aser Prince Philip; kiyimla aianu aser ‘maid of honor’, Princess Beatrice; aser par tsüraburtem, Prince Andrew aser Sarah “Fergie” Ferguson nunger densema liasü.
Eugenie’er kinungertem nungi tamarener kibong aruagi aden, kasa mapang kiyimsang adianu Thomas Brooksbank best man liasü. Prince William aser Kate’er chir asem rongnung anati tsürabur den aruagi aden. Bridesmaid trok rongnung arishi küm 3 tain Princess Charlotte densem aser arishi küm 5 tain Prince George pageboy liasü.
Kiyimba sentong nung tamarenertem dak alaka, actress Demi Moore den mapang talangka tembar süa aruba America nunger florist aser perfumer, Eric Buterbaugh, kenttener, Robbie Williams aser Ricky Martin, actress Liv Tyler, model Naomi Campbell aser Kate Moss nungera tejaoker nisung 850 rongnung densema liasü.