Principal AG (A&E) Kohima nung Mobile App ‘nGPF24X7’ tenzük

Kohima, Luchii/December 06 (TYO): Tanü Office of the Principal Accountant General (A & E) Kohima-i Mobile App ‘nGPF24X7’ tenzükogo; iba sentong nung tongti tejaokerji Addl. Chief Secretary & Finance Commissioner, L. Temjen Toy, IAS aser tetushi tejaokerji Principal Account General (A &E) Telangana, Hyderabad, S. Snehalatha, IA & AS liasü.
Tongti tejaoker, L. Temjen Toy-i mobile App ‘nGPF 24×7 tenzüktsüba sülen lokti den jembidang pai, mobile App ‘nGPF 24×7 tenzükba ajanga department tejakleni aotsü aser state sorkar o Department na tesendaktep tajungba küma taliba amalitepa inyaktsü, ta metetdaktsü.
Paisa, digitalization ajanga pension mapa inyakdang tetsükdaktsü malitsü, ta shia GPF statement details shidi aser computer ajanga inyakba aliba agi Mobile App-i melenzükba indang metetdaktsü.
Kasa sentong nung S. Snehalatha-i, mobile App tasen tenzükba ajanga Principal Accountant General (A & E) Kohima ano mera ka tejakleni ogo, ta shia department-i meranga inyakba atema tenüngsang agutsü.
Lokti pelaa agizükba o jembidang IA & AS Principal Accountant General (A&E), E. Mhonbemo Patton-i, 1974-75 küm Shillong, Meghalaya nungi kongsang aruba sülen department-i küm 44 tashi state nüburtem tenzüka arudar, ta metetdaktsü.
Paisa, Nagaland State sorkar mapa inyakertem GPF Accounts atema NIC, Nagaland-i mobile App ‘nGPF 24×7 ya yanglu aser Principal Accountant General (A &E)-i achaayanger, ta metetdaktsü.
Iba App ya Online GPF Information System version tilaba mesüka lir, koba ajanga GPF subscriber temi parnok indang GPF Account osangtem- GPF status, Annual Statement aser Missing credits pei indang mobile phone nung angutsü.
Iba App ya smartphone nung Google Playstore nungi download süatettsü.
Kahoto J Yepthomi, IA&AS, Deputy Accountant General (A&E)-i tepela anküp o jembidang Mobile App ‘nGPF 24×7 yanglusang, Scientific/Technical Assistant, NIC Nagaland State Centre, Somnath Sui nem tenüngsang agutsü.
Sentong nungsa Hemanta Kr. Saikia, SIO Nagaland aser Kemvu Elah, Addl. SIO, Nagaland nati iba App indang powerpoint presentation ka ajanga metetdaktsü.
Iba sentong ya Akum Chuba, Sr. A.O/GPF leniba nung agia liasü.