Printing & Stationery dept. ya state sorkar atema tongtiret ka lir: Director

Kohima, February 10 (TYO): Directorate of Printing & Stationery, Nagaland, Kohima pur departmental staff picnic February 9, 2019 nü Pony Farm, Kigwema nung mongogo, ta ketdangsertem osang ka ajanga metetdaktsü.
Establishment Branch aser Technical Sections naprong nungi staff tem den jembidang Director, Wati L. Imchen-i, küm aika Printing & Stationery department ya state sorkar atema tongtiret rongnung ka liasü, ta ashi.
Staff temi, talisa technical staff temi kanga meranga inyakba atema tenüngsang agüja pai, “Sorkar indang printing mapatem alidangbo asenoki asen tajungtiba agi tenzüker aser aonung 10:00 nungi 11:30 ako tashia inyaker. Iba ama mapang nungjibo staff tem atema Deobar anogo-a mali,” ta ashi.
“Asenoki district offices ajak aser directorate nem nüngdakba forms aser papers agutsüba ajanga sorkar indang printing mapa ajak inyaktsür,” ta pai ashi.
Tarutsü nunga maneni amalitepa inyaktsü ayongzüka Imchen-i state sorkar dang department nem temelung agüja tanüasüng adokba machine equipments tajung agutsütsüla, koba ajanga sorkar nem quality aser services tajungba agutsütettsü, ta ashi.
Picnic anogomong nüngtem nung lottery draw ka asaya, staff temi kentenmenü aser tsüngsang balala agi shilem agi aser noksa tangoktep.
Taoba Republic Day benjungmong atema kanga tongtibang ketdangsertem onük ajentsüdang staff tem amoi-a moi printing mapa inyakogo, anungji südoksünemtsü atema staff tem asoshi picnic ya ayongzüka agiogo.
Iba picnic nung staff 250 shi aden.