PRISM-i illegal Bangladeshi immigrants meyipa yoktsü ajungmesor

Aizawl, July 3 (Agencies): Mizoram nungi illegal Bangladeshi immigrants meyipa yokba maparen nung state nung aliba political party tir ajak longjemer inyaktsüla ta People’s Right to Information and Development Implementation Society of Mizoram (PRISM)-i ayongzük.
PRISM-isa Mizoram electoral roll nungi Bru voter tem tenüng agientsü atema takhangba agütsü.
PRISM-i MNF, MPC, MPBJP, MPCC aser ZNP tirtem dang züluba shidi ka nung “Citizenship Amendment Bill tanaben benoktsü sentong lir aser iba ya Mizo nunger aser political party tem o NGOs-i magizüker” ta shia lir.
“Mizoram nung party aser senso ajak longjemer CAB anema noktaker, ajisüaka asenoki anemba ajanga temelenshi angutsü asü masü’ar memetet. Iba jagi Bill tanaben mebenokdang illegal Bangladeshi immigrants ajak meyipa yoktsüla” ta PRISM-isa ashi.
Election Commission of India (ECI)-i tim mesüi inyakba ajanga Tripura nung alirtem aika Mizoram electoral roll nung züluok. Iba onük atema High Court nung public interest litigation (PIL) ka benoktsü atema mapa inyakdar, ta PRISM-isa metetdaktsü.
PRISM-isa state home minister Lalchamliana dang Mizoram nungi Bangladeshi illegal immigrants meyipa yoktsü atema temepishiba shidi ka züluogo.