Priyanka ajanga Congress nung inyakertem tashi itshiogo: Khurshid

Hyderabad, February 21 (Agencies): Congress lenir tain, Salman Khurshid-i, taruba Lok Sabha election nung BJP-i aniba NDA tamakok ngudaktsütsü asoshi Congress-i opposition party tem anidentetogo, ta ashi.
Taoba mapang Union Minister, Khurshid-isa, Lok Sabha election agitsü lia tawa Priyanka Gandhi Vadra-i yimtenren nung ajemokba ajanga Congress nung inyakertem tashi itshidaktsüogo; party nung inyakertemi tejangraba tulu nung inyakdar, ta metetdaktsü.
Pai ashiba agi, Lok Sabha menden lemsatsü atema Congress asoshi joko mapang mali, ajisüaka mapang tetemsü nung ibaji tembanga inyaktsü.
Interview ka nung jembidang pai, Priyanka-i yimtenren nung ajemokba metet-meteter; Congress nung inyakertemi tejangraba tulu nung inyakdar, ta ashi. “Raratsü atema election ka lir aser onok jakdang mapa tasak aika lir. Tang ama mapang ka nung lai (Priyanka) yimtenren nung ajemokba ajanga tongbang tuluka koktettsü,” ta pai ashi.
Priyanka-i tedi, Rahul Gandhi ajateta inyaktsüa akok, ta nisung aikati jembiba dak sendakba nung tasüngdangba ka langzüdang pai, “Tenati senpeter junga inyaker; joko mapang tatsüka tena longjemer inyaka arudar. Tena tsüngda tesendaktep kanga junga lir. Rahul Gandhi ama lai mapang shidak nung telemtetba tajung agiogo,” ta ashi.