Priyanka ajanga India-a alima sabang nung jangjaa kümogo

 

September 15, 2015:Film yanglur Madhur Bhandarkar-i, “Pai yangluba ‘Fashion’ film nung tongti shilem agila, Priyanka Chopra-i India tenüng nung alima tesem balala sema shilem agiba asoshi kanga akümketa bilemtsüla,” ta ashi.

“Asenoki Priyanka-i inyakba nung ulua bilemtsütsüla kechiba süra lai bendanglen project balala nung takok ngua inyaktetba ajanga India-a alima sabang nung jangjaa kümogo,” ta Bhandarkar-i IANS dang ashi.

Priyanka ya tang-a America TV series “Quantico” nung shilem tagidak lir aser ano la Bhandarkar den “Madamji” film atema külemi inyaktsü sentong lir.

“Madamji film ya ni kanga meimer kechiba süra iba otsü tarensen yagi kü dak kanga kongshi. Priyanka-ia iba film kanga meimer kechiba süra lai-a iba film tamendakdakji kanga junger ta bilemer aser ibaji ajanga shilem agitsü kanga jangrar,” ta Bhandarkar-isa ashi.

“Dil Dhadakne Do” film nung tongti shielm agila, Priyanka ya tang project balala nung mazüngi aliba ajanga Madamji film tangoktsü tera menor. Ajisüaka kena prongla azüngba mapang ka nung film tangokba mapa tenzüktsü, ta pai ashi.

Bhandarkar ya tang pai yangluba film “Calendar Girls” ajungketba mapa nung kanga mazüngi jajadar.

“Calendar Girls” ya September 25 nü sayatsü sentong lir.