Priyanka Chopra-i taküm Oscar nung sempet agütsütsü

New Delhi, February 2, 2016 : America TV atema tan mezüngsüa ‘Quantico’ nung shilem agiba sülen tesem aika nung sentong balala nung dena jajala, Priyanka Chopra-a February 28 nü akatsü aliba Oscar sentong nung sempet agütsür rongnung ka asütsü shimtetogo.
Tesüiba ita Screen Actors Guild Awards (SAG) aser People’s Choice Awards sentong nung adenla, Priyanka Chopra-i iba osang ya twitter ajanga metetdaktsü. La taküm Oscar mapang red carpet nung jajatsü.
Priyanka ya Bajirao Mastani film nung tesüsa shilem agia lir aser tang US nung lai shilem agiba TV sentong nung anünga aliba shilem tetangokdak lir.
Tan Oscar nung sempet agütsütsü pur rongnung Priyanka den Jared Leto, Kerry Washington, Julianne Moore aser Quincy Jones nungera densema lir.
Lai iba osang sangoktsüba sülen nungi nüburtemi la den salem lemsateptagi. Taküm January ita People’s Choice Awards mapang laia award ka nguogo.
Taküm Oscar sentong nung India nungi Priyanka kijai adentsü kechiba süra foreign film tarensen nung 2016 Oscars atema India nungi “Court” film benoka liasü ajisüaka tia makai teshimtet pongu rongnung maden.
La ya Hollywood film Baywatch nunga shilem agitsü aser India nunga ‘Jai Gangaajal’ film nung shilem agiba angutsü.
Academy Awards sentong ya February 28, 2016 nü Dolby Theatre Hollywood, California nung akatsü.