Priyanka Gandhi-i Amethi aser Raebareli nung nübo yimtsütsü

Lucknow, February 10 (Agencies): Congress Tir, Sonia Gandhi’er jala, Priyanka Gandhi Vadra-i February 13 nü Uttar Pradesh nung Amethi aser Raebareli jila na nung nüboyimba sentong tenzüktsü, ta tanü party lenir kati metetdaktsü.
Iba constituency ana ya la tedi aser Congress tatong Tir, Rahul Gandhi aser tetsü, Sonia na Lok Sabha menden lir.
Uttar Pradesh assembly election mezüngbuba shilem nung menden 73 atema election agitsü, ajisüaka lai Congress aser Samajwadi Party (SP) teloktep candidates atema nübo meyimtsütsüa akok.
Osangbenertem dang party lenirisa, tang atemabo Priyanka-i parliamentary constituency ana nungji party candidate 10 atema dang nübo yimtsütsü, ta metetdaktsü.
Ajisüaka tesülenbo lai teloktep nung tanga candidates atema-a nübo yimtsütsüa akok.
Congress aser SP na loktepaka constituency asem – Amethi, Unchahaar aser Gauriganj nungbo party anapronglai tokteptsü.
Ano külen Sonia Gandhi-ia February 20 nü Raebareli nung party candidates atema nübo yimtsütsü.
La temang manemi aliba ajanga tang tashi nungbo lai election nüboyim sentong metenzük. Ano Rahul Gandhi-ia February 18 nü Raebareli nung aser February 24 nü Amethi nung nüboyim sentong nung jembitsü.
Amethi nung February 27 nü aser Raebareli nung February 23 nü election agitsü.