Priyanka-i anir UP nung congress atema nübu ayimtsü

New Delhi, July 05 (Agencies) : Congress Tir Sonia Gandhi’er jala Priyanka Gandhi Vadra-i anir Uttar Pradesh assembly election atema nübu ayimtsü, ta Mongulbarnü party sangdong ka ajanga metetdaktsü.
“La lenisüba künok nübu ayimtsü indang osangji tejangja lir. Iba osang ya AICC (All India Congress Committee) ajanga anogo khenü ananü ka tsüngda nung metetdaktsütsü,” ta osang kar ajanga IANS dang ashi.
2017 küm assembly election nung Priyanka Gandhi aser tesüiba mapang Delhi Chief Minister Sheila Dikshit nati shilem tulu agitsü ta aikati jembir.
Dikshit-i, “Linük nung nütsüng yoksük timtiba aliba state, UP assembly election atema nübu ayimba mapang Priyanka Gandhi ‘chief campaigner’ asüba ajanga mapa akoktsü,” ta Hombarnü ashi.
“Nübuyimdak Priyanka kanga pela agizüktsü kechiba süra la UP nung ajaki kanga junga meteta lir,” ta term asem atonga atonga Delhi Chief Minister inyakla, Dikshit-i ashi.
Osangbenertem aser TV channel temi anogo ananü shi Prinyanka adenba sentong kanga metetdaktsüdar. La ya nübuyimtsü atema nüngdakba nisüng lir. Party atema la ya hadir tajung ka amai lir.
Congress otongdar Randeep Surjewala-i, “Onoki tebilemba jembiba nung mapang meindokner, anungji Priyanka Gandhi Vadra UP election atema nübu ayimtsü telemtetba agir ang onoki osangbener ajanga iba osang tejangja metetdaktsütsü,” ta Mongulbarnü metetdaktsütsü.
Congress telok nung Prinyanka nema ketdangser menden kecha angutsü mangutsü ta asüngdangdang Surjewala-i, “Mapang shia Congress lenirtemi party ketdangsüba mapa nung nisung balala shimoktsü shidanga arur. Parnoki yamaji tetuyuba tajung agütsüba onoki kanga pela agizüka parnok nem akhümtsübu angütsür. Aji oda süaka party ketdangsüba mapa nung shimoktsü atemaji Congress Tir Sonia Ghandhi aser Tatong Tir Rahul Gandhi nati state nung party lenir tem dang asüngdangtepa temelaba agir ang shimer,” ta langzü.
Arishi küm 44 tain, tanur ana tetsü, Priyanka Gandhi-i tetsü o teno na indang constituency Rae Bareli aser Amethi na nung nübuyimtsütsü.
Lai mapang kar nungbo Sultanpur nunga oa nübuyimja liasü. Congress lenirtem aser party atema inyakertemi la dang party ketdangsüba menden ka tanga agizükang ta mepishiaka lai magizüki arur.
Congress züngsem aikati Rahul Gandhi dang nungia Priyanka Gandhi dak tangar atsüa arutsü sempet taketba aser la nübuyimba yimya balaka asüba ajanga party-i UP nung nüngdaka aliba vote ngutettsü.
Uttar Pradesh ya Congress-i mapang talangka amanglemer liasü ajisüaka tangbo tang yimsü tesüdak Samajwadi Party, Bahujan Samaj Party aser Bharatiya Janata Party nunger den kanga petteptsüsa kümogo.
2014 Lok Sabha election nung UP nungi Congress candidate anadang adok— Sonia Gandhi aser Rahul Gandhi.