Priyanka-i UP election nüboyim sentong 150 nung jembitsü: Congress

Meerut, July 03 (Agencies): Assembly election aika nung Congress-i tamakok nguyonga aruba sülen party-i parnok asentenshitsü merangba mapang ka nung osang tajung kaji- Congress Tir, Sonia Gandhi’er jala aser Congress tatong Tir, Rahul Gandhi teno, Priyanka Gandhi-i Uttar Pradesh assembly election atema nübo yimtsütsü.
Tanü osangbenertem den jembidang Uttar Pradesh Congress Committee (UPCC) otongdar kati, Priyanka Gandhi-i state tesem ajak nung nüboyimja election nüboyim senden 150 nung jembitsü, ta metetdaktsü.
Otongdarisa ashiba agi, iba nüboyimji balaka asütsü, kechiyong lai Amethi aser Rae Bareli menden dak alia tesem ajunga nung nüboyimtsütsü.
UPCC communications department mendenbuba, Satya Dev Tripathi-i, “Priyanka Gandhi-i tongti shilem agitsü aliba ajanga Party nung inyakertem kanga ajungmesoogo. Iba sentong ano junga metembang ajisüaka Uttar Pradesh election nüboyim nung lai tongtibang shilem agitsü. State tesem ajaklen election nüboyim sentong 150 nung lai jembitsü. Taoba mapangtem nung lai Amethi aser Rae Bareli (Rahul aser Sonia Gandhi na constituency) na nunga nübo yimja aruogo. Tangbo iba Lok Sabha constituency dak lai tanga nung nübo yimtsütsü,” ta metetdaktsü.
Paisa, “Iba ya nisungtemi kodanga majangshiba ka asütsü. Tan election nung Congress-i junga inyaktettsü, temaba level nung iba sentong renema jembiogo. Tatemsabuba sentongji Congress Tiri asameyangtsü,” ta ashi.
Tang Meerut nung alisang Congress lenir, Nagma-ia, “UP nung Ghulam Nabi Azaad leniba kübok onoki junga inyaktettsü ta onoki melung alemer. Pa ya aika ajangshia aliba lenir ka lir. Taoba election nunga onoki menden karbo nguogo. Election asameyang tembangdar, aser iba sülen election nüboyim tenzüktsü,” ta metetdaktsü.