Priyanka-i UP election nung shilem tulu agitsü: Sheila Dikshit

New Delhi, October 23 (Agencies): Taoba mapang Delhi Chief minister asemben tashi inyakla aser Uttar Pradesh nung Congress Chief Minister candidate, Sheila Dikshit-i, Uttar Pradesh nung Rahul Gandhi-i nübo sashia ayimdang Priyanka Gandhi ji nübo jenti bendener ka asütsü, ta ashi.
Sangküm küm tetenzüklen UP assembly election agitsü lia Congress lenir tain, Sheila-i state kanga sema senzüdar aser lai, BJP-i Uniform Civil Code benokba ajanga tamangba onük nung ajemdaker telemsa adokdaktsütsü meranger, ta aitsü.
Arishi küm 78 Dikshit-i, Congress tatong Tir Rahul-i Kisan Yatra ajanga party nung inyakertem kanga ajungmesoogo, aser Priyanka-i shilem tulu agitsü telemtetba agira party atema sayatenya ka asütsü, ta ashi.
Election atema Congress terenemshiba dak sentakba nung lai, iba election atema party-i tesem balala apir manifesto balala renemtsü, kechiyong tesem bablala nung tebilemtsü onük balala lir, ta ashi.
Laisa, state nung party asentenshiba temaitsütem lir, ta ashi.
Iba election nung party shingaia majority mangutsü, ta shia Dikshit-i, taruba sorkar akumba mapang Congress-i tongtibang shilem ka agitsü, aser election sülen BSP mesüra  Samajwadi Party den lokteptsü party-i marendaktsü, ta ashi.
“Nisungtemi Congress sorkar tashii meyipa arudaktsüner. Lokti ajaki sorkar balala agi laktetogo. Tangbo UP nüburtemi temelenshi ka aginer. Congress-i Dalits aser Muslim nunger densema lokti ajak atema inyaktsü,” ta laisa ashi.
Dikshit ya Brahmin nungi asüba ajanga party-i Brahmin nunger vote angutsü teimla nung la Congress Chief Minister candidate shim.