Priyanka shimba ajanga Rahul-i tamakok anguba kuli sayur: BJP

New Delhi, January 23 (Agencies): Mapang talangka nungi Congress Party Tir, Rahul Gandhi teno, Priyanka Gandhi-i yimtenren nung ajemoktsüa akok ta jembia aruba sülen tanü lai yimtenren nung ajemokogo.
Tanü Congress-i la Uttar Pradesh East nung General Secretary shim. April-May ita nung Lok Sabha Election agitsü lia lai yimtenren nung ajemokogo.
Iba osang sangdongba sülen BJP lenir aikati Congress party aitsüogo.
Lai yimtenren nung ajemokba ajanga taruba Lok Sabha election nung BJP-i timtem ajurutsü asü? ta asüngdangba langzüdang BJP otongdar, Sambit Patra-i, “Iba ya BJP atema tayongzükba ka masü. Iba ya imlaa liasü. Iba ya kibong ka yimtenren, aser iba ya ajanga Rahul Gandhi-i tamakok anguba kuli sayur. Tarutsü nung Robert Vadra (Priyanka kinüngbu)-ia yimtenren nung ajemoktsü. Gandhi tem ang party Tir akumtsü akok,” ta ashi.
Uttar Pradesh Deputy Chief Minister, Dinesh Sharma-ia, Priyanka shimba ajanga UP aser ajaklen yimtenren nung temelenshi malitsü, ta ashi. “2014 küm election nung lai menden 46 atema nübo yimtsü, saka party-i menden 2 nung ang takok angu,” ta pai ashi.
Ano BJP lenir, Babul Supriyo-i, “Iba ya Congress telung inyakyim ka lir. Küm aika iba ya imlaa liasü, aser tanü lai yimtenren nung ajemokogo,” ta ashi. “Iba ya ajanga temelenshi adoktsü ta jembibaji democracy den mapet. Iba nisungi (Priyanka) yimtenren indang kecha memetet, ajisüaka ajungbena menden tulu ka asoshi la shimogo,” ta paisa ashi.
BJP lenir aser Minister of State for Culture & Tourism and Civil Aviation, Mahesh Sharma-ia, “Iba ya imlaa liasü. Yangi kecha tasen mali,” ta ashi.