Priyanka Twitter amshir timbai anidaker Asia tsür 3 buba akümer

Mumbai, December 18 (Agencies): Bollywood actress-singer aser tesüiba Miss World, Priyanka Chopra Twitter amshir nisung timbai anidaker Asia tsür 3 buba kümogo.
Tanü, Hokolbar nü tashi nung Twitter amshir nisung million 12 shi la den sentakba osangtsüsang Twitter ajanga bushia Priyanka-i iba jenjangji ajangzük.
“Ni meimer nisung million 12 prongla dang pelaba metetdaktsür. Iba ya nenoki kü nem tia akatsü sempet tajung agütsür lir,” ta Priyanka-ia Twitter ajanga lemsatep.
Nisung million 14.5-i anidaka, Indonesia singer-actress, Agnez Mo-i 1 buba aser nisung million 12.5-i anidaka, Bollywood actress, Deepika Padukone-i 2 buba jenjang ngua lir.
Priyanka-i bendanglen kententsü sentongtem nung shilem agiba den külemi, America nung yangluba television series, ‘Quantico’ nung tongti shilem agitsü tenzükba ajanga lai India nem konang tulu bener arutsüogo.
2000 Miss World takok korang ajangzükla, Priyanka-i Ranveer Singh aser Deepika na den külemi tesüsa India nung shilem agiba ‘Bajirao Mastani’ film-a tanü India nung sayaogo.