PRJA candidate asemi okadak affidavit nung sign asü

Imphal, February 24 (Agencies): Manipur nung tanga yimtenren party tem ajak aoksadakja, PRJA candidates- Irom Sharmila Chanu, Erendro Leichombam aser Najma Bibi nungeri Brehostibarnü parnok election nung shim nungbo senotsü lemzüktsübatem ochishia amshitsü tenangzükba agia affidavit nung sign süogo.
Parnoki ochishia aser ajak dang senotsü amshiba melangzütetra, mapa nungi anentsü asoshi nangzük.
Yimten yimsüsüba asadangertem aser social activitist temi PRJA candidate-i jenjang temerük agiba asoshi tenüngsang agutsü. Parnoki maneni tanga party tem nungi candidate temia Manipur nung March 4 aser 8 election sülen yimsüsübaren tajung bener arutsü asoshi PRJA pur tsüngsü nung anidaktsüla, ta ashi.
Imphal, Manipur Press Club nung parnok manifesto metetdaktsüba sülen parnok pusemer den külemi indang indanga Cheirap okadaki oa oath commissioner tsüngdang affidavit nung sign asü.
Affidavit nung yamai zülua lir, “Ni legislative assembly nung züngsem ka amai shimra, ni teshimtet züngsem ka ama kü mapa ochishia aser temolung agüja inyaktsü.”
MLA Local Area Development Fund (LADF) aser tanga fund tem ochishia amshitsü asoshi maneni affidavit nung shisema lir, “MLA Local Area Development Fund aser tanga fund ochishia aser senotsü indokba nübur tsüngdang melangzütetra ni mapa nungi anentsü, aser ozüng nung aliba ama merenshiang.”
Harvard University nung taoba mapang azüngsang, Erendro-i nübortem shidakba tenzüknüra aser shidakba democracy bener arunüra, yamala mesükba tenangzükba nung sign asütsü asoshi tanga candidate tem jazük. Elendro-i Thangmeiband menden atema election nung tokteptsü, aser Sharmila-i Thoubal nungi chief minister Okram Ibobi Singh den tokteptsü. ‘Women and child activist’ Najima Bibi-i Wabagai menden asoshi tokteptsü.
Maneni PRJA pur tenla Brehostibarnü tashi nung lakh 20 dak tali sarutetogo. Parnoki iba tenla online ajanga bendenba sentong ‘Ten4Change’ onük nung ajemdaker tenzük.