Pro Kabaddi: Pink Panthers teloki temaba jenjang nguogo

Pro Kabaddi: Pink Panthers teloki temaba jenjang nguogo

Mumbai, July 23 (Agencies): Jaipur Pink Panthers teloki points 29-22 agi Patna Pirates telok madak takok ngua, tang tagidak Star Sports Pro Kabaddi League tetoktepba nung temaba jenjang yashi, Hokolbar nü nguogo.
Yashi mezüngbuba asaya shilem nung Panthers teloki points 9-11 ngua tekübokba jenjang nung asaya saka tanabuba asaya shilem tetenzüklen par teloki points 13-13 ngua Pirates telok den kasa jenjang aküm.
Yamaji asayaba sülen Ajay Kumar-i amakba point 7 tashi ajangzükba densema, par Pathers teloki points 15-14 agi temaba jenjang ngua asayaba sülen külem asayar, Jasvir Singh-ia par telok asoshi points 5 tashi ajangzükja kanga junga asaya.
Asaya tembangtsü minute 8 shi anünga aliba mapang tashi nung Pirates telokia points 18-20 ngua Panthers telok point 2 agi dang memenepi asaya.
Ajisüaaka, asaya tenzüker minute 39 buba tashi nung Panthers teloki points 29-20 ngua, Pirates telok den point 9 agi points timba ajangzüka asayaba sülen par teloki points 29-20 agi takok nguadok.
Tan takok anguba sülen Panthers teloki ajak agi points 47 ajangzüka temaba jenjang angur telok aküm aser Pirates teloki ajak agi points 42 ajangzüka 2 buba jenjang nung lir.
Ano külen, Bengal Warriors telokia points 31-27 agi U Mumba telok madak takok ngua, ajak agi points 35 ajangzüka 3 buba jenjang anguba telok akümba osang jangjaogo.

You must be logged in to post a comment Login