Pro-Streax United & Meriema VYO na prequarter-i iogo

Kohima, October 01 (TYO): Pro-Streax United, Dimapur aser Meriema Village Youth Organisation telok nati tanü Brehostibar nü takok ngua tang tasayadak 16 buba NSF football asayamong pre-quarterfinal nung shilem agitsü jenjang nguogo.
Khuzama Youth Organisation teloki tanü mezüngbuba asaya nung mezüngbuba goal agütsü saka par teloki tamakok ajurua liasü.
Tanü mezüngbuba asaya tenzüker minute 4 buba nung Menguse-i goal 1 agüja par Khuzama Youth Organisation telok temaba jenjang nung ajungkettsü saka Meren-i par Pro-Streax telok asoshi goal 1 minute 16 buba nung agüja par telok anaprongka kasa jenjang kümdaktsü.
Ano, Kito Aye aser Meren nati minute 19 aser 28 buba na nung goal ka ka agütsüba ajanga par Pro-Streax telok goal 3-1 agi temaba jenjang aküm.
Asaya tanabuba shilem nung, asaya tenzüker minute 43 buba nung Menguse-isa tanabuba goal agüja par Khuzama telok jenjang tajungba kümdaktsü.
Ajisüaka, Meren-i tan asayamong nung hat-trick 8 buba yanglur asayar küma minute 45 buba nung goal 1 agütsüba den külemi, külem asayar, Pokhozo-i minute 49 buba nung goal 1 agütsüba yong par teloki goal 5-2 agi takok angu.
Meriema telokia goal 6-0 agi Capital Collge, Higher Education telok madak tanabuba asaya ajemshia akok.
Tanü asaya nung Neiphriezolie Üsou-i goal 4 tashi agüja tan asayamong nung hat-trick yanglur asayar 9 buba aküm.
Tesülen, külem asayar, Kekhriese Ciesotsu-i goal 2 aser Kekhriengulie goal 1 agüja par teloki tanü takok angu.