Pro tsüngtepertemi Rio 2016 nung shilem agitsü imlar: Wu

Lausanne, March 01 (Agencies): Taküm Brazil kübok Rio de Janeiro yimti nung asayatsü ayongba Olympics asayamong nung professional (Pro) tsüngtepertemi shilem agitsü imlaba olen ka International Boxing Association (AIBA) Tir, Dr Ching-Kuo Wu-i tanü, Mongolbar nü metetdaktsüogo.
Pro tsüngtepertemi amateur tsüngtepertem den aroki Olympics nung shilem agitsü asoshi AIBA-i taoba February ita mapa tenzükba ama, AIBA temzüng asangsang nung taküm June ita melenshia yanglushira, pro tsüngtepertemi Olympics nung toktepa shilem agitsü jenjang angutsü.
Ajisüaka, pro tsüngtepertem nem Olympics nung shilem agidaktsüba ajanga Olympics asoshi küm jenti terenemshiba agir amateur tsüngtepertem indang jenjang mejungi kümdaktsütsü ta bilema tan benokba pro tsüngtepertem nem Olympics nung shilem agidaktsütsü mapatongji aikati anemtsü tenzüka lir.
“Pro tsüngtepertemi Rio nung shilem agitsü. Parnok kwi shi shilem agitsü ni tang meshitettsü saka parnok ajungai tanüngba tsüngtepertem ama Olympics nung shilem agitsü temsüa akümtsüla,” ta Wu-i metetdaktsü.
“AIBA temzüngi pro tsüngtepertemi Olympics nung shilem magitettsüsa tetsükdakba ngudakja lir saka taküm June ita amentsü ayongba AIBA Extraordinary Congress senden nung AIBA temzüngji melenshitsü alizüng yua lir,” ta pai ashi.
Paisa ashiba agi, AIBA temzüng asangsang nung melenshia yanglushiba sülenbo pro tsüngtepertemi Azerbaijan nung taküm June ita tumlen agitsü ayongba Olympics nung shilem agitsü temsüa akümtsü qualifying asayamong nung toktepa shilem agitettsü.
Wu-i ketdangsüa, küm 4 tejaklen London nung ayongba Olympics nunga tetsür tsüngteptsü tetoktepba mezüngsüa agia liasü.