Prodigal’s Home nung CCSCL training agi

Dimapur, May 16 (TYO): May 2, 2017 nungi Prodigal’s Home-i Certificate Course on Social Concern and Leadership (CCSCL) agiyonga aruba Mongulbarnü temogo.
5 buba Certificate Course batch nung shisaliok reju balala nungi kaketshirtem aser tangartem iba sentong nung shilem agi.
Loktiliba nung tangar memeneper aser teküpoktiba jenjang nung alirtem den inyaka arudang, arogo, lokti lennirtem aser social workers kümnürtem nem certificate course agütsütsü tebilemba aru, ta Prodigal’s Home, Director, K Ela-i tanü o jembidang ashi.
Loktiliba dak sendakba onüktem metettsü aser item asoshi inyaktsü atema training agir. 2013 küm training agitsü tenzük aser mezüngbuba alizüngji küm pungu tsüngda kaketshir 100 training agitsüba liasü, saka taküm tashi nung nisung 107-i training agiogo, ta Ela-isa ashi.
Taküm küm nisung 24-i training agiogo aser Prodigal’s Home-i maneni iba sentong tajungtiba nung agitsü sentong lir, ta laisa shisem.
Sentong nung OTS, Bade Associate Professor, Dr. James Kalong-i Prodigal’s Home ajanga training agirtem nem tesayuba tajung agütsüba atema tenüngsang agütsü.
Paisa, training agirtem dang tangazükbatemji pei atema masü saka Tsüngrem sentsüwangshi atema amshitsü ayongzük.
Sentong nung Prodigal’s Home, Assistant Director & Course Director, Maong Jamir-i training agir nem kulikaket agütsü aser DABA, Rev. Dr. N Tzudir-i training agirtem meshiteta sarasademtsü.
Training course nung adenertemi parnok ajangshibatem lemsatep.