Prof Lanunungsang Ao aser Ahidur Rehman na nem Peace award agütsü

Dimapur, Feb. 1 (TYO) : Taoba Nagaland University Pro-Vice Chancellor, Prof Lanunungsang Ao aser Muslim Council Dimapur Working president, Ahidur Rehman na nem Peace Channel-i Peace Award agütsüogo.
Dimapur Town Hall nung 2 buba National Peace Convention alidang tena nem Peace Award agütsü.
Prof Lanunungsang Ao-i kaketkeno dak sendakba maparen ajanga Naga nunger tsüngda yimjung yangluba nung shilem agiba aser Ahidur Rehman-i March 5, 2015 lendong atalokba sülen aser ano 2012 küm NE kaketshirtemi South India toktsür aruba tatalokba nung kin o kin putepa alitsü asoshi mapa inyakba ajiteta Peace Channel-i tena nem sempettemji agütsü.
Iba sentong nung tongti tesemdangerji Dimapur DC, Kesonye Yhome liasü aser pai ashiba agi, ozüng alema inyaksangshiba loktiliba ka nung yimjung kanga nüngdaka kümogo.
Yimjung ajanga lokti nung temeten adokdaktsür, kati ka akhümtsübutepdaktsür aser taküm libaliro akhüm ketdaktsür. Nisung ajak külemi longjemer alima nung tangatetba tamajungtem melenshitsü aser katika ajungmesoteptsüla, ta Kesonye Yhome-isa ashi.
Tesüiba mapangtem nungi khen khen tesempatep adokdaktsü asoshi shisaliok amshiogo, saka iba ama peace convention ajanga temelenshi bener arutsü aser tangar tebilemba melenshitsü nükjidong yur amungtsüla, ta paisa ashi.
Sentong nung Prof Lanunungsang-i o jembidang, pa ibala peace award angutsü temsüa mali saka pai yimjung asoshi inyakba ajiteta iba sempet agütsür asütsü akok, ta ashi.
Naga nunger ajak yimjung meimertem dang lir. Asenok ya nokinketertem nungi jakzükertem lir saka tanü asenok tekolak atangertem masü. Asenok yimjung meimertem kümogo aser asenoki yimjung ajungkettsü asoshi tasü itta inyaktsüla, ta paisa ashi.
Northeast aser Nagaland nung mesüra linük tesem mashi ka nung inyakba tesayurtemi pei class nung dang masü saka yimdong nunga yimjung meimertem asütsüla, ta Prof Lanunungsang-isa ayongzük.
Paisa tesentepertem ajak dang mangatettep koktettsü atema Gandhi tesayubatem sülen anidaktsü ayongzük.
Ahidur Rehman-ia Peace Channel dang pelaba metetdaktsü.
Pa iba sempet angütsüsa inyakba mapatemji, pa kijai inyakba masü saka teloki inyakba lir. Anungji pai mapa inyaker ajak dang tsüngdong tonga oa pelaba metetdaktsütsü aser Nagaland nung alirtem tsüngda yimjung aser telongjem asoshi pai maneni inyaktsü, ta , ta Rehman-isa ashi.
Iba sentong nung Bishop of Nagaland, Most Rev James Thoppill-ia loktiliba nung yimjung adokdaktsütsü indang onük jembi.