Proxy lima !

Proxt tetezü tangar melena inyakba. Atangji, tangar melena inyakbaji yimten tashi kati temelaba agütsür inyakba süra, ibajibo ozüng raksaba mapa ka masü anungji tai masütsü. Ajisüaka, Nagaland nung proxy otsü jembiba yabo meteta aser memeteti ozüng raksaba mapa inyakba indang jembir. Aji oda, proxy ta kodang jembidir, jet ta asenok mulungjangi election agiba anogo nung tangar tenüng nung vote enoktsüba indang arur. Tangar asoshibo aji tai aser taaktsüka saka asenokbo yimya sübadoker, joko taiang shitak aser shitakang tai amato bilemer. Iba amaji shitak agi tai amato aküm aser tai mapatemang shitak amato inyaker ta Nagaland ya asenoki proxy state ka kümdaktsüogo. Aji oda, election nung karbo tangar tenüng nung terben-metsüben tashi vote enoktsüba lir. Item jagi tangari meinyaktetba mapa tajung tuluka inyaktet amato kanga nümadanga jembir. Item nisung asoshi vote agütsüba anogo ya sen aaba anogo tajung ka ama bilema ozüng raksaba mapa nümadangdanga inyaker. Ibayongji, asenoki sen meyirijang ishika angutsü mechi asen lima raksayonga kecha apayua mebilemer. Aji oda, tang tashi nung asenoki asen lima agi asenok nümamedangtettsüsa alibaji proxy vote agi yimsüsür shimba aser proxy vote agi government akümba ajanga lir. Proxy vote tetezü proxy election  aser proxy election agiba ajanga anguba takoksatemji proxy gari lenmang, proxy mozü ki, proxy school ki, proxy lu, proxy government office-tem asütsü. Iba proxy tia nungi asenok shitakba nüchi dangi arua proxy nisung masü saka shitakba senso tajung ka akümtsüla. Atangji, proxy ya election mapang enoktsüba proxy vote dangbo masü saka Nagaland tasüng proxy tesayur aser proxy mapa inyakertem lir. Tazüngbo shitakba nisung ka azüng saka teinyakerbo tangar ka inyaker. Mapabo nisung ka angur saka teinyaksang aser teinyaklajibo tangar ka. Aji oda, shitakba shimba nisung melen proxy tesayurtemi sayuba HSLC aser HSSLC result-ji majungtsü. Iba amaji mapa angusang tenüng balaka saka teinyaksang balaka aser ano ita sen agizüksangbo balaka ta Nagaland nung proxy inyakba mapa ya tamamangtsüka lir. Aji oda, mozü kidang inyakertema proxy doctor aser proxy nurse lira, ibajibo lendong tulu, anungji tetsübutsüka. Ashiko, Nagaland nungbo mozü kidanga proxy doctor aser proxy nurse-tema alitsüa akok. Aji oda, proxy vote agi election agia government akümba sülen school nung proxy tesayurtem nem sayudaktsü, proxy nisung nem shirangertema anepaludaktsü aser proxy nisungtem dang office nunga mendaktsü. Iba amaji government nungi anguba teyaritem shitakba kaketshir, lanur, sensaker-mekokmeiner, yimtaklir, aluyimer aser shirangertem masü saka proxy kaketshir, proxy lanur, proxy sensaker, proxy yimtaklir, proxy aluyimer aser proxy shirangertem nem dang agütsüba ajanga shitakba teyari angutsü purtembo mangu Nagaland tebilemtsü agi sünga lir. Atangji, Nagaland ya proxy lima dang masü saka “Bogus lima” ta ajatsü akok, kechiyong tiyazü nisungtem tenüng nung ita sen achir, pension agir aser teyari tapu balala  agirtem agi Nagaland sünga lir. Item ochimashi teyari jagi ishika jangratema alir aser aika timtemdaktsür. Kopika, yamai shitakba Nagaland meyanglutet, Proxy aser Bogus Naga lima nung alitsü ? Kopika ozüng raksaba mapatemang shitak aser ozüng kübok alibabo tai amato asenok alitsü ? Kopika Proxy aser Bogus mapatem agi nübortem tejakleni moudaktsüi soittsü ? Nagaland meimra proxy vote enoktsüba yimya aser bogus inyakyim mapatem ajak anentsüla. Aji oda, Nagaland ya proxy lima masü saka teindang aser ochishir agi koka aliba lima ka asütsüla. Asenoki proxy vote enoktsü tashi , proxy school aser mozü ki anepalu tashi, bogus tenüng nung tajangzük agi tashi, asen lima  ya proxy lima aser bogus lima asütsü. Asenok aliba Naga lima ya asenok meyong masü saka tarutsü chirnur aser semchirsemnurtem meyong lir, anungji parnok asoshi proxy lima aser bogus lima kabo asenoki senmang küma yanglua medoktsütsüla.