PSAN-i ‘back door appointments’ anema lungkak ait

Kohima, July 3 (TYO): Nagaland nung ‘backdoor appointments’ kanga buluba aser sorkar department temi Nagaland Public Service Commission (NPSC) ajanga nisungtem shimoktsü melemzüktsüba anema Public Service Aspirants of Nagaland (PSAN)-i tanü New Secretariat Junction nung lungkak aitba sentong ka agiogo.
“Yimsüsürtemi taruba election atema bilemer, PSAN-i tarutsü putu atema bilemtsür”, “Tokteptsü atema onok nem maongka agüjang”, “Backdoor inyakyim anenang, tetoktepba ajanga shimang”, “Tanü onok takoksa angurtem lir, asüng takoksa angurji nür chirnurtem asütsü akok” aser “Tetemjen nübo peria yutsür kechiba mapa meinyakteter ang shimer” ta PSAN züngsemtemi tezülubatem amer lungkak ait.
“Sorkari temeten magütsü tashi onoki lungkak aittsü” ta PSAN convenor Nitoka Swu-i osangbener dang ashi.
June 6, 2016 nü Personnel and Administrative Reforms Department Office Memorandum nung ‘contractual appointments’ ajak nokdanger ta shia aliba ama State sorkari mapa inyaktsüla, ta PSAN-i takhangba agütsü.
Parnokisa, mapa tazüngtem NPSC ajanga direct recruitment asütsü atema takhangba agütsü.
“NPSC kübok aliba mapatem nung backdoor/contractual ajanga shimokba nisung ajak mapa nungi anentsütsüla” ta Nitoka-isa ashi.
PSAN-isa state sorkar dang, political grounds nung ajemdaker deputation asüba inyakyim anentsüla aser India Linük Temzüng Arrla 16 nung aliba ama Nagaland sorkari tashishitsü kecha melii aser open competition ajanga nisungtem mapa nung shimoktsüla, ta takhangba agütsü.
Tanü lungkak aitba sentong nung ANCSU General Secretary Benjong Lonchar aser Tenyimia Students’ Union Dimapur nungi teshimtet nübotemi PSAN pusema nungita o jembi.

Sorkari June 6, 2016 sülen shimba mapatem meyipa reprangtsü
Kohima, July 3 (TYO): Public Service Aspirants of Nagaland(PSAN)-i lungkak aitba aser kümdangtsü ashiba sülen State sorkari mapa inyaktsü nangzükogo.
PSAN, Nagaland Convenor dangi züluba shidi ka nung Nagaland Chief Secretary, Pankaj Kumar-i “June 6, 2016 sülen contract nung shimokba mapatem ajak state sorkari meyipa reprangtsü aser item mapatem NPSC nem agütsütsü” ta shia lir.
August 11, 2016 nü P&AR office memorandum nung adhoc & contract basis nung shimokba nisungtem P&AR Department ajanga reprangtsü, ta Chief Secretary-isa ashi.
State sorkar kübok department balala nung NPSC kübok aliba mapatem deputation asübaji reprangshimtsü aser iba asoshi PSAN-i appointments/deputations indang osang tejangja agütsütsü mepishir, ta paisa shidi nung metetdaktsü.