PSG-i Lille club madak 2-1 agi takok angu

Paris,April 24 (Agencies) : Paris Saint-Germain club-i Coupe de la Ligue asayamong nung Lille club madak 2-1 agi takok nguogo.
Iba club ya 1970 küm tetentet aser parnoki pezü tashi Ligue 1 marok atonga atonga bena lir. Tang tashi nung iba club ket nung takok marok 29 tashi lir, ta Xinhua osang ajanga metetdaktsü.
Honibarnü Stade de France nung iba takok anguba ajanga linük nung PSG jenjang kanga tashi ita kümogo. Tang parnok club nung mendenbuba Nasser Al-Khelaifi lenisüba kübok parnoki iba title 11ben bena lir.
Qatar nunger Nasser Al-Khelaifi parnok den 2011 küm nungi arua densemba sülen PSG-i Ligue 1 title pezü, Coupe de France ka, Coupes de la Ligue asem aser Trophees des Champions asem ta benogo.
Coupe de France final asaya nung parnok Marseille den May 21 nü asayatsü.
Honibarnü asayaba mapang Angel di Maria-i minute 75buba Lille club nem goal ka agütsüba ajanga iba takok ya aguba lir.
Iba goal ya meyok tsüngda asaya tenzüker minute 40buba nung PSG atema Javier Pastore mezüng goal yoka liasü.
Iba goal yoker minute pezübuba nung Lille club nungi Djibril Sidibe goal ka yoka 1-1 aküm.