PSY-i kensep tasenba, ‘Chiljip PSY-Da’ sayaogo

Seoul, December 01 (Agencies): South Korea nunger rap kentener, PSY-i kensep tasen ka Seoul yimti nung tanü Mongulbarnü sayaogo.
Küm 3 tejaklen ‘Gangnam Style’ hit ken tena alima ajunga nung nüngtugu nisung ka akümba sülen PSY-i tan mezüngsüa iba kensep tasen sayarba lir.
Taoba mapang Gangnam Style ken mejema atenba sülen alimai imlaba ama ken tajung mejema metentettsü akok ta tsüboa bilemba yong pai küm 3 dak tema kensep tasen madokba olen ka PSY-i metetdaktsüogo.
“Ni mejemba ken tasen Gangnam Style ama ken tajung ka masütsü akok. Ano, alimai taoba mapang sapua angaba ama ni mejema atenba ken tasen mesaputsü akok, ta tsüboa bilemba yong ni küm ishika kensep tasen mesayai aru,” ta Seoul yimti nung ‘Chiljip PSY-Da’ kensep tasenba sayadang PSY-i tanü lemsatepa liasü.
PSY-i ‘Gentleman’ single ken sayar küm 1 ser tesangdang shi süir külen tan ‘Chiljip PSY-Da’ kensep tasenba ya sayar asütsü.
‘Chiljip PSY-Da’ ya Korea oshi nung ‘Ya PYS’er 7 buba kensep lir’ lir.
Alima ajunga nung nisung billion 2.46 dak temai ‘PSY 6’ kensep nung densemba ‘Gangnam Style’ video ken YouTube nung repranga, Gangnam Style video ken-i YouTube nung video ka timba reprangba otsü yanglua liasü.
PSY-i tan sayaba kensep tasenba nung dance music, hip-hop aser punk ken shilemtem densema lir.