Pua aliba ochimashi senji sensakertem atema amshitsü: Amit Shah

New Delhi, October 24 (Agencies): BJP Tir, Amit Shah-i, Centre sorkari bendanglen ochimashi sen apuba ajakji sensakertem atema amshitsü aser senso shia bank account nung sen lakh 15 inoktsütsüji jembitsü menüngdak, ta ashi.
Honibar nü India TV ‘Aap ki Adalat’ show nung Shah-i, “Bendanglen rizünga aliba ochimashi sen ajakji nisung shia sen lakh 15 adoker ta Modi-i jembiogo (Lok Sabha election nüboyimba mapang), ajisüaka iba tetezü, item sen ajakji nisung shia account nung inoktsütsü ta mangatettsüla,” ta ashi.
“Pai jembiba tetezüji, ochimashi sen apubaji sensakertem atema amshitsü ta shinüba lir,” ta Shah-i jangjashitsü.
Iba onük nung Congress tatong Tir Rahul Gandhi-i BJP aitsüba atema Shah-i iba oji Rahul nem meyiptsüogo.
“Rahul Gandhi-i jembibaji pa tebilemba dang lir. Ajisüaka ni ya ashir, sorkar senpong nungi kodaser nisung shia account nung sen lakh 15 inoktsütettsü,” ta BJP National Tir Amit-i ashi.
Dadri nung Muslim nunger ka tepsetba dak sentakba nung Shah-i Uttar Pradesh aser state police aitsüogo.
“State police-i tamangba yimsü mebendangi inyak nungbo Uttar Pradesh nung item ama rara aser tatalokba malitsü. Ajisüaka vote angutsü atema police-i kar anema dang inyakra tamangba lokti anaprong nungi telangzüba alitsü, aser ibaji ajanga item ya ataloker,” ta Shah-i ashi.
Kaket keno zülurtemi Sahitya Akademi awards meyipa agütsüba dak sentakba nung Amit Shah-i, kaket keno zülurtemi awards meyipa agütsübaji Uttar Pradesh aser Karnataka ya Samajwadi Party aser Congress Party nati yimsü asüba state asüba ajanga lir, ta ashi.
“Award meyipa agütsür kaket keno zülur ajakji Congress aser SP sorkartem anema lungkak aiter,” ta pai ashi.