Pua bener aoba Nigeria tsür kaketshir 76 chiokogo

Lagos, Metsüremi 21 (Agencies) : Ita ka tejaklen Nigeria anüdoklentip tsütsü Dapchi yimti nungi pua bener aoba kaketshir tetsür chanu parnok 110 rongungi par neter trokbo tanü Rasemnü Boko Haram Islamists purtemi chiokogo aser parnokji yimti tonga meyipa aruogo, ta sorkari metetdaktsü.
Information Minister Lai Mohammed-i ashiba agi, linük nung aliba tembar kar teyari ajanga tesülen nungi kar nendaka inyakba sülen parnokji chiok.
“Par neter trokji tang tashi nung tenüng züludena alirtem dang lir,” ta paisa; parnokji tanep 3:00 ako nung chiok aser tang parnokji tejangja züngdangdagi.
Dapchi yimti nungi pua bener aoba tetsürtemji kümzüka anir arutsü asoshi sepai tashi amshia mesüi ken o angatettepa jembitsüang sorkari shimtet, ta taoba hopta nungto Nigeria Tir, Muhammadu Buhari-i metetdaktsü.
Mohammed-isa ashiba agi, “Pua alirtem kümzüktsü atemaji tashiyim amshira tetsür chanutem taküm lendongbang nung lir ta sorkari angateta liasü anungji tashiyim mamshiidang inyaktsüang shimtet.”
“Tetsür chanutem anir aruba mapang tesem kar nungbo sepaitemi tesem mita jajaba anena ayu; tetsükdaktsü kecha melidaktsütsü aser parnok taküm mesamadaktsütsü mechi yamaji inyak.”
Nigeria Tir den jurila jembidang pai ashiba agi, tang tetsürtemji linük nung intelligence agency, Department of State Services pur ket nung lir.
February 19 nü Dapchi yimti nungi pua bener aoba maparen jagi 2014 küm Chibok yimti nungi tetsür 200 dak tema pua bener aoba indang mulung zürepa bilemtet.
Arishi küm 16 tain kaketshir, Aisha Alhaji Deri, shiba Dapchi nungi pua bener aortem rongnung densema liasü, lai osangbenertem den jembidang ashiba agi, parnok pua ayuba mapang parnok mezüngmeshia mamshi.
Aji oda süaka, “Onok pua bener aoba mapang len tom nung parnok pongubo süadok,” ta laisa olen ka shisem.
Laisa ashiba agi, “Parnoki tanep onok meyipa anir arutsü aser motor park temalen anizüka toktsü; parnoki onok dang ashibaji, onok ajak kidangi indang-indanga aotsüla kechiaser sepaitem dangi ora parnoki nenok kümzük ta tenüng agitsü merangtsü.”
Tamalen AFP osang den jembidang tsürabur kari ashiba agi, tanep 8:00 ako meta tetsür chanutemji gari teku nung Dapchi yimti tonga anir arutsü. Parnokji kar temeket yimtsüngtem nung pei kidangi meyipa ao.
Tetsürtemji parnoki pua bener ao ta Islamic State (IS) teloki memetetdaktsü saka iba maparen ya Abu Mus’ab al-Barnawi-i aniba teloki inyak ta jangjaogo.