Public tem ya VIP tem aser MLA temji parnok kilirtem lir: Charles Pyngrope

Shillong, Metsüremi (March) 24 (Agencies): Rogonü (Hokolbar) Congress MLA aser Nongthymmai MLA, Charles Pyngrope-i VVIP sobaliba agientsü atema mapang talangka bilema aruba osang lemsatep.
State Assembly nung jembidang Pyngrope-i MLA tem ya kilir aser public tem ang VIP tem lir, anungji asenoki parnok akhümtsübutsüla, ta metetdaktsü.
“Nübortemji VIP tem aser asenok ya parnok kilirtem lir. Asenoki parnok akhümtsübutsüla” ta PWD Building, GAD & Fishery Minister, Comingone Ymbon-i onük ka benoka olemtepdang Pyngrope-i iba olen jembi.
India kübok tesem balala nung yanglua aliba Meghalaya house tem nung taktang aika VIP tem atema mekazüka lir saka nüngdakba nübortembo anenzüktsü taktang mongui timtemer, ta paisa ashi.
“Taktang tazüngtem liaka tetsütem kinü tanur ajunger kima nung parnok anenzüktsü atema ataa aliba kü tenük agi nguogo. Kechiba ta süra, taktang tazüngtemji VIP tem atema mekazüka yua lir. Kechiba parnoki MLA mesüra ketdangsertem dang taktang nung anenzüktsü atema mepishidaktsür?” ta paisa asüngdang.
Meghalaya House tem nung Minister tem indang taktangji kanga tulu aser taktang asem tashi adoktsüsa tawaji lir. Kechiba asenoki yamai lalushibonger? ta paisa ashi.
“Taktangtemji akosar taktang talila yanglulokang, kechiyong tatem nungbo asenok ajaki yipten temerük ka aser metsümeshidak temerük ka dang nüngdaker” ta Pyngrope-isa shisem.
“Ni sorkar dang public ojang dang timtemdakjang ta ayongzüker. Taktang mali ta mashitsüla, sorkari iba onük assohi bilemdangtsüla aser mapa küma inyakra ajak ajangzüktsü” ta paisa ashi.
Meghalaya house ya Delhi nung ana, Kolkata nung ana aser Mumbaim Vellore aser Guwahati nung ka ka lir.
Taoba Speaker Pyngrope-isa “VIP sobaliba ya agientsüla kechiyong iba nüngja nung tetezü kecha mali. Kechiba ta süra, kodang VIP ka shirangdir pa kasa ICU nung anepalur, kodang pa cinema hall kati odir kasa menden nung dang amener. VIP ka asoshi yipten mesüra menden balaka magütsür” ta metetdaktsü.