Puducherry CM-i LT Kiran Bedi lutsü

Thiruvananthapuram, Rongchii (April) 10 (Agencies): Sangtennü (Mongulbar) Puducherry Chief Minister Narayanasamy-i Kiran Bedi luja olen ka ashidang “Union Territory nung administration indang file ajak noktangba Lt Governor tajung ka lir” ta ashi.
15 buba Finance Commission-i state balala nem senotsü lemzüktsüba nung temulung masüba atema tanü Southern state tem senden ka amendang Narayanasamy-i iba olen jembi.
“Onok LT governor Kiran Bedi tajung ka lir. Lai file ajak noktanger, saka anogoshia ni la den rara kechiyong onoki democracy aginür aser co-operative federalism maneni odaktsünür. State tem indang temetentem kümzüka ayutsüla” ta Narayanasamy-i ashi.
Anogo ka senden nung southern state tem aser Puducherry nung Finance minister tem ajak aden.
Narayanasamy-i Kiran Bedi den onük aika atema tekong merangtepa arur. Bedi ya Monupii (May) 2016 nung UT Puducherry nung Lieutenant Governor ka ama inyaker.