Puducherry sorkari ni tenüng atema dang inyakdaktsünür : Kiran Bedi

Hyderabad, January 10 (Agencies) : Puducherry nung Congress sorkar den mangatettep tuluba küma Lieutenant Governor Kiran Bedi-i tanü ashiba agi, Puducherry sorkari laji tenüng ka ama dang inyakdaktsünür.
La ketdangser ka ama inyaktsü mapa nungloktsü saka tenüng atema inyakdaktsüsü süra, la telemtetba nungi masetshir, ta Kiran Bedi-i ashi.
Sangküm May 29 nü lai la menden toktsütsü osang sangdongba atema ashidang, “lai mapaji kümsük atema masü saka teinyaksü ka atema mapa agizük” ta laisa ashi.
“Lt Governor ka indang mapaji tenüng ka dang masü saka ketdangser ka ama inyaktsüba li, saka Congress sorkaribo ni tenüng ka atema dang inyakdaktsünür” ta Bedi-isa shisem.
Puducherry nung Congress sorkar den mangatettep tuluba küma oaka, taoba hopta tu Bedi-i la kümsük küm ana tembangba sülen ang lai iba menden toktsütsü ta metetdaktsü.
Yaküm May 29 nü la LG inyaktsü mapa agizük aser iba anogo ya tetsü tasoba anogomung lir. Iba yongji lai tebilemtsü khuret bena iba mapa inyaktsü aser kasa anogo ka nung menden toktsütsü lemtet, ta Kiran Bedi-isa ashi.
Puducherry nung Congress MLA 8-i Union Home Minister Rajnath Singh dang Kiran Bedi-i mapa timi meinyakba atema tezüluba ka nung metetdaktsüba sülen January 7, 2017 nü lai iba osang metetdakja liasü.
Chief Minister V Narayanasamy-i social media ajanga sorkar dak sendakba osangtem tongtepratep masütsü tetuyuba agütsüba lai agienba sülen MLA temi la anema tezüluba agütsü.