Puerto Rico nung cancer agi shiranger nem Pitbull-i tayimtsü agütsü

September 28, 2017 (Agencies): Hurricane yipru agi raksatsür aliba Puerto Rico nung alir cancer agi shiranger nem Pitbull-i pa juri tayimtsü amshidaktsü.
Rap ken adener arishi küm 36 tain Pitbull-i pa juri tayimtsü ya Hurricane Maria agi raksatsür aliba Caribbean asetkong nung cancer agi shiranga alirtem US nung chemotherapy treatment agi aotsü atema amshidaktsü.
“Tangar yaritsü moatsüba asoshi Tsüngrem dang kanga pelar. Kü shilem inyaker dang lir,” ta Pitbull-i osangbener dang ashi.
Iba ama aria bilema mapa tajung inyakba asoshi Puerto Rico Congresswoman Jenniffer Gonzalez-i Pitbull dang pelaba ashi.
“PR nung cancer agi shiranga alirtem USA-i anir oa chemo agidaktsütsü asoshi nü indang juri tayimtsü amshidaktsüba asoshi kanga pelar @pitbull,” ta Twitter nung Gonzalez-i zülutsü.
Iba yipru tesashi ajanga Puerto Rico asetkong nung tzümetsüng adok, ki ajunga indang kilem onzüka yok aser iba asetkong nung nütsüng million 3.5 alirtem indang electricity raksatsü.
Iba asetkong nung aliba nüburtem nem teyari agütsütsü asoshi nüngtugu nisung aika aru aser item rongnung Jennifer Lopez desema lir. Lopez aser tetong Alex Rodriguez nati Puerto Rico nüburtem nem teyari sen million $1 agütsü.