Pughoboto Inter-High School Sports asayamung tenzükogo

Dimapur, Mongputeni/October 31 (TYO): 1buba Inter-High School Sports Meet Pughoboto, October 31 nü Public Ground Pughoboto nung EAC Pughoboto, Luchui Fithu-i tenzüktsüogo.
Fithu-i ashiba agi, education ya classroom nung agütsüba kija ya masü. Education ajanga kaketshirtem nem parnok meim sempet, yimyayimpong aser lenisütsü sempet aliba bushitettsü asoshi teyari agütsütsüla. Laisa, kaketshirtemi tali taroki ia shidangtsü aser tebilemtsü bentettsü asoshi parnok mulungsentsü lapoktsüla aser iba den ano tanga inyakyim nung takok tashi shilem agitsüla, ta ashi. Fithu-isa, kaketshirtemi classrooms nung angazükba, video games asayaba aser pei mobile nung video repranga kazüba dak dang rangloker malitsüla saka lenla ajak nung renloka aotsü atema saisapong balala nung shilem agitsüla ta ashi.
Iba asayamung ayongzüka agitsü atema SDPDP Pughoboto-i agizük. Asayamung ya kaketshisatsü dak alia lenla ajak nung terenlok bener arutsü, school o school tsüngda tesendaktep tajungba yanglutsü aser Pughoboto aser school nung inyaktsü asoshi lemzüka aliba officer tem sabang ka nung longjemdaktsütsü nükjidong nung ayongzük.
1buba Inter-High School asayamung nung, GHS Pughoboto town, GHS Lazami, DBS Lazami, New Foundation School aser Mission School, Pughoboto-i shilem agitsü. Saisapongtem rongnung badminton, volleyball, asemtepba aser arr atsütepba densema lir.
Tanü asayamung lapokba sentong ya Administrator NFS Pughoboto, Anito Swu lenisüba kübok aka aser SDAO Pughoboto Myanthung Patton-i lokti pelaa agizükba o jembia liasü. Sentong nung temoatsü meshia Associate Pastor, Youth PTBC, Gamalial-i sarasadem aser Qhehuli Swu-i ken tajung ka aten. Maneni asayartem tenangzüktepba agiba sentong PET GHS teacher, Hokiqhe Sheqi lenisüba kübok agi, ta APRO Pughoboto sangdong ka ajanga metetdaktsü.