Entrepreneurs Association CEO, Neichute Doulo-i Pughoboto Sub-division kübok yimtsüng temerüktiba Kilomi yimtsüng nem kulikaket aser cheque agütsüba noksa nung angur.
Dimapur, November 15 (TYO) : 3 buba Thuwu-ni benjungmung ananübuba nung 2016 küm Pughoboto sub-division kübok yimtsüng temerüktiba sempet Kilomi nem agütsü.
Iba asoshi Kilomi yimtsüng nem LADF 2016-17 kübok sen lakh 5 senpet agütsü.
Sentong nung tetushi süa jaokerji Entrepreneurs Associates CEO, Neichute Doulo liasü aser pai village council chairman nem senpet den kulikaket agütsü. Iba sentong nung R&B Minister, Y. Vikheho Swu liasü dena liasü.
R&B Minister-i Thuwu-ni-Recap onük jembidang, asen sobaliba chichiba nung bushitsü aser asentenshi atema 2014 küm iba benjung amungtsü tenzük aser kanga dang kar melenshia ainba alima ka nung iba ya nüngdak ta ajiteta tenzük, ta ashi.
Sobaliba ken, yartsüngsangtem, asayamenü aser otsütem mesamadaktsütsüla, ta Vikheho Swu-isa ayongzük.
Paisa, Pughoboto nung lanur entrepreneur tem dang akhidang nungi benshia aruba inyakyimtem aser tanü-asüng benshiba yimyatem tsüngda seret odanga mapa inyaktsü atema tayongzükba agütsü.
Nagaland Entrepreneurs’ Association (NEA)-i Pughoboto nung alirtem den yaritepa mapa inyakba atema R&B Minister-isa NEA dang pelaba metetdaktsü.
Kavili Swu-i Nagaland Designers’ Association dang Pughoboto sayuba atema Vikheho-i pelaba lemsatep aser paisa Gloria Tep, Ketholeno Kense, Guru Rewben Mashangva aser shilem agirtem ajak pelaba shisem.
Yanpvuo Kikon-i Pughoboto nunger dang cycle race sayu aser pai Minister Vikheho dang iba ama benjung tajung ayongzükba atema tenüngang agütsü.
Cycle race nung Shillong nungi Isamul-i mezüngbuba jenjang takok angu aser pa nem sen 30000 senpet agütsü.
Tanabuba jenjang nung Alemba, Kohima (sen 20000) aser tasembuba nung Himachal Pradesh nungi Raj Kaushal (sen 10000) nati takok angu.
You must be logged in to post a comment Login