Pul-i Arunachal tatar senden nung pa pusemer kuli sayutetogo

Itanagar, February 25 (Agencies): Brihostibarnü Arunachal Pradesh Chief Minister tasenba, Kalikho Pul-i tatar senden nung pa lenisüba pusema adener MLA 40 sayutetogo.
Pul pusemer MLA 40 ji Congress nungi MLA 27, BJP MLA 11 aser independent MLA ana lir.
Taoba Chief minister Nabam Tuki’er Congress MLA 9-i Pul nungittsü yashi Bodhbarnü nangzüka liasü aser parnok ajaki tanü pa nem vote agütsü.
Yashi CLP chief whip (Tuki telok nungi), Rajesh Tacho-i party MLA tem dang Pul nem vote magütsütsüla ta tuyuba sülen taoba Chief minister, Tuki akhanga nungiter Congress MLA 17 tanü assembly-i maru.
Ano kelen CLP chief whip (Pul telok nungi) Pema Khandu-i tanga whip ka dang party MLA tem dang tang teinyaktak chief minister nem vote agütsütsü tuyuang ta metetdakja liasü.
Tanü chief minister Pul-i House nung motion bushidang pa densema züngsem 40 pronglai teka mekanga liasü. Iba sülen tang tasen shimba Speaker, Wangli Lowang-i, “Confidence motion züngsem 40-i pusemba ajanga kokogo,” ta sangdong.
Pul-i, New Delhi nung Congress Tir, Sonia Gandhi ajurutsü aiben meranogo, ajisüaka la ajurutsü memela, ta ashi. “Onoki party bangtak lenirtem dang lenir melentsü asüngdang, saka Congress party anemabo kecha meinyak,” ta pai ashi.
February 9, 2016 nü state nung President’s Rule agienba sülen ghonda ishika tsüngda Pul chief minister atema tenangzükba agia liasü.
Tanep o lemtep senden ka nung Chief minister Kalikho Pul-i state Angh dang tepela o ashiba sülen pai, par sorkar ji Congress sorkar lir ta ashiba den külemi taoba CM, Nabam Tuki den pa nija onük kecha mali ta ashi. “Onok raraji ochimashi aser ketdangsüba anema liasü. Nija mangatettep kecha mali. Ozü sorkar ya Congress sorkar lir,” ta ashi.