Pulwama nung kiralongrartemi CRPF sepai 5, police ka tepset

Pulwama, August 26 (Agencies): Honibarnü Jammu & Kashmir, Pulwama nung kiralongrar asemi amakdang CRPF pongu den police ka tepsetogo.
Osang angazükba agi, kiralongrartemji tang district police lines (DPL) telung nung lir. Tanep anepongi kiralongrartem jagi Kashmir, Pulwama district nung aliba police building ka amak.
Tanep 4:30 ako meta telungpurtem jagi district police lines (DPL) amakdang security sepai pezü den police ka asü, ta police ketdangser kati metetdaktsü.
Ketdangsertemi ashiba agi, telungpurtemji tang tashi compound telung nungji lir aser maneni parnok den raradar, iba den külemi special police officers (SPOs) anabo tang tashi building telung nungji lir.
Osangbenertem den jembidang Union Home secretary, Rajiv Mehrishi-i, “SPOs ketdangser ana building telung nungji lir aser tena kümzüka lir asü masüar onoki mejangja,” ta metetdaktsü.