Pulwama nung sepaitem azü tokshibaji amajokbosa masutsü: Amit Shah

New Delhi, February 22 (Agencies): Tanü BJP National Tir, Amit Shah-i, tawa Jammu & Kashmir kübok Pulwama nung kiralongrartemi amakdang sepaitem azü tokshibaji amajokbosa masutsü, ta metetdaktsü.
NDA sorkari kiralongraba mapaji khenyongi magizüktettsü, ta shia pai, Tamil Nadu nungia CRPF sepai ana densema asüba metetdaktsü.
Tanü Tamil Nadu kübok Ramanathapuram nung party nung inyakertem den jembidang pai, “Jammu & Kashmir nung linük kümzükdang Tamil Nadu nungia sepai anati taküm tenla agutsüogo. Taküm tenla agutsür tasütait sepaitem nem ni akhüm agutsür,” ta ashi.
Mongolbarnü state nung ruling AIADMK den BJP tezüngzüktep ka agiba sülen tanü mezüng party nung inyakertem den jembidang pai, Tamil Nadu aser Puducherry naprong nung teloktep candidates ajaki takok angutsü atema meranga inyakdaktsüner, ta ashi.
“Asenoki election nung menden pongu atema dang metokteptsü, saka AIADMK den lokteper menden 40 prongla nungi tokteptsü,” ta pai ashi.
AIADMK, PMK mesüra BJP nung inyaker ajaki teloktep candidates-i takok angutsü aser Narendra Modi tanaben Ato kilonser akumtsü atema inyaktsüla, ta pai ashi.
DMK aser Congress aija pai, “DMK aser Congress na longjemra ochimashi, BJP aser NDA na longjemra yimsüsüba tajung,” ta ashi.