Pulwama school nung tapoktsü lendong nung kaketshir 12 yiru

Srinagar (Jammu & Kashmir), February 13 (Agencies): Tanü south Kashmir nung Pulwama district kübok Singoo Narbal area nung aliba nija school ka nung tapoktsü ka apokba lendong nung kaketshir 12 yiruogo, ta police-i metetdaktsü.
Tang yirua aliba kaketshirtemji district hospital Pulwama-i anir oa yaridar. Doctor kati ashiba agi, kaketshirtemji timbaka tebok ser tsünglanglen yiru.
Pulwama hospital nung yarirtemji tang tajungba lir saka karbo Pampore town nung aliba hospital-i anir ogo, ta doctor-isa metetdaktsü.
Osangbener den jembidang police-i, “Nikongdang 2:30 ako meta Narbal, Pulwama nung aliba nija school Falai-e-Millat indang class takdang ka nung tapoktsü ka apok, aser iba lendong nung kaketshir 12 yiru,” ta metetdaktsü.
Iba dak sendakba nung ken o ka züluokogo aser maneni bushisüngdangdar, ta police-i metetdaktsü.
Iba school nungji inyaker tesayur, Jawed Ahmed-i, “Ni tanurtem dang lesson sayuba mapang nung ajungbena tapoktsü ka apok; iba lendong nung kaketshir kwi yiruar ni mejangja,” ta ashi.
State Angh, Satya Pal Malik-i yirua alir shia nem sen 50,000 teyari agutsütsü ta sangdongogo aser school nung iba lendong atalokba atema tesasaba olen ka lemsatepogo.
Angh-isa Divisional Commissioner Kashmir dang yirua alirtemji akokba tashi tajungtiba agi yaritsü tetuyuba agutsüogo.