Pune nung sen 150,000 atema millionaire ka tepset

Pune, July 16 (Agencies) : Pune nung alir multi-millionaire Datta D. Phuge par jabaso’er medemer kati tepset, ta Honibarnü police-i metetdaktsü. Ashiba agi Phuge-i pa tepsetsang nem sen 150,000 agütsütsü liasü.
Phuge nem ‘Pimpri Goldman’ ta tenüng jaloktsür liasü.
Hokolbar anepdang Phuge tepsetertemi pa li nok, noklang nok, kotari aser merang amshia yirutsüba sülen Dighi tesem nung long tulu agi onset. Iba osang angashia Pune nung alirtem, balakata takartem kanga aoksatep.
Police-i iba lendong atalokli yongi nisung tepseter rongnung parnok nisung pongu pua lir. Parnok ajak ya ano lanur kaka dang lir.
Tasüsanger jabaso arishi küm 21 tain, Shubham D. Phuge-i ashiba agi, tebu tepseter anogo nisung pezü tang tashi mangu bushidar.
Tang pua alir parnok ponguji arishi küm 24 tain, Amol (Balli K. Pathare), Shailesh S. Walke (küm 26), Vishal D. Parkhe (küm 32), Nivrutti (Balukishan Walke) (küm 35) aser Pramod S. Dholpuria (küm 23) nunger lir.
Phuge tepsettsü tasa asasang, Atul Mohite-bo tang mangu bushia aliba parnok pezüng rongnung tensema lir.
Police-i ashiba agi, Brihostibar aonung 10:00 ako meta Atul Mohite-i phone ajanga Shubham dang parnok medemer ka tasoba benjung nung adentsü atema tebu mamai anir arutsü nenshia ashi.
Benjung adeni arudang biryani parcel 10 aser moko pongdang 2 mamai alir arung ta Mohite-i Shubham dang ashiba bushisüngdangertemi ashi.
Shubham-i iba osangji tebu dang ashi aser chiyungtsü abeni medemer Rohan Panchal dena pa gari bener ao.
Ajisüaka tena Mohite-i ashiba tesem atongdangbo Mohite aser tangartemi tebu dak kanga mejungi lepa aser tsünga liasü. Pai gari anener teyari atema ayimten saka kanga menur liasü.
Iba azüng meyak tesem nung Phuge azü agi yimbanger tasür dang liasü.
Iba tatalokba ngua kanga aoksar Shubham aser Panchal nati police control dang mobile ajanga osang agütsü tiyalong nung Mohite den parnok nisung 10 shi ammang nung atsüka jena ao.
Iba lendong tenük kuli angur Shubham aser Panchal nati police nem case agütsü aser mapang tatsüka lir külen Phuge kinungtsü, municipal corporator Seema-a iba tesem tonga aru .
Phuge-i pa tepsetsang nem sen 150,000 agütsütsü aliba magütsüba mechi pa tepset, ta bushisüngdangertemi ashi.
Phuge ya teti pa bodyguard dena dang senzür, saka iba aonung ya kodaser parnok pa den maliasüar mangateter.
2012 küm Phuge-i sen million 10 alang 22-carat hon temeja agi tulaka nung Swarovski crystal buttons inoka arba aser iba denji putepa hon belt ka yangluba sülen nübur ajaki pa kanga jangja meteta aküm.
Pa ya sen aputsür nisung ka liasü aser kinungtsü den Vakratund Chit Fund Pvt Ltd-a repranga liasü. Pai sen ochi meshii amshir ta nüburtemi tawa tanü kanga nüngnüngtepa liasü.
Pa meyong hon tulu ya alima nung sen jenjang timtiba tula lir. Pune nung aliba Ranka Jewellers-i arba iba hon tula tuozük 3.5 kg lir.
Ashiba agi tula nung hon naro 14,000 waitepa lir aser tanga tula den saku tasemtsü kanga anisüngzük süngzüker.