Pune nung tzünglu ajanga nisung 12 asü

Pune (Maharashtra), September 26 (Agencies): Brihostibarnü Maharashtra kübok Pune district nung tzünglu sashia aruba ajanga tzümetsüng aser jara chirepba lendong nung nisung 12 süogo.
Baramti densema tzümetsüngba tesemtem nungi nisung 15,000 dak tema aienshidakja liasü, ta Maharashtra Chief Minister, Devendra Fadnavis-i metetdaktsü.
Yimti tesem balala nung tasümang 8 angu aser fire brigade officials-i Ambegaon Khurd area nung tasümang ka angu, ano Khed Shivapur nunga nisung asem asüba osang liasü.
Chief Minister Devendra Fadnavis-i twitter ajanga, “Baramati nungi nisung 15000 aienshidaktsüogo. Tangbo tensa azüoktetogo,” ta metetdaktsü.
Asürtem rongnung nisung tekubo Sahkarnagar area nung jara chirepba ajanga asü. asürtem rongnung arishi küm 9 tebur chanu ka densema liasü.
Tensa apir Pune district collector, Naval Kishore Ram-i Pune aser temeket nung aliba Purandar, Baramati, Bhor aser Haveli nung schools aser college ajak sodi sangdonga liasü.
CM Devendra Fadnavis-i, “Tzünglu ajanga Pune aser temeket nung nisung asüba osang angashia jashir. Mangyimer kibongtem den ni mangyim jashi lemsateper. Onoki akokba tashi nüngdakba teyari ajak agütsüdar. State disaster management officials aser control room-i Pune collector aser PMC den maneni tongtepratepdar,” ta metetdaktsü.
District nung kümzükba maparen inyaktsü atema National Disaster Response Force (NDRF) team pezü lemzüktsü aser iba mapang nung Fire Brigade officials-i Sahkar Nagar nung tasümangtem angu. Tzünglu ajanga ki 200 dak tema raksatsüogo.