Pungmang nungi asangsang

~ C. Lima Ozüküm (Mongsenyimti) 

Asür ka shilua akümlir dangi aru
Tesüngmangtsü melenshiba pai angu
Pa akümliwa menungra senzü
Ongpang azüng tesemtem sema jaja
Tenemtemi lenden aküm
Lendeni tenem kolak

Par lima nüburtem ajurutsü yongyaa jaja
Yimtiji arempok nung rami-ramir
Yimdongji meyiwa lusak mesük
Nisungtem nüksak pangten mashilen peleta orr
Jembishinü saipangi
Limapur yimsü leni

Lajar ki ka nung mokozü alonga angu
Metenloka nokdak yangji apu ka
Aküm keta merapang tongnüseni
Tzüsen lanu yang nungjagi pokteta adok
Ayongti küma yima alu
Ochiba senmang putusa putu

Pungmang lima toktsür asangsang dangi shilang
Mapangi matasa oadoker liasü
Sasa bilem ali shih rokonger tang
Masetshiba Tsüngrem kü dak liasü
Itsük-i isü melen ama
Temenen den lidima?

Tanüker toktsü takotet tashi tait mitkartem
Anüng menempangtet ama mekümzüktet
Temulungjang nung Tsüngrem O shipang
Nisungi merakzüktet Kodak atong
Jana küma ao alirongsen
Senti taküm pai meyok.