Punjab CM ji state nungisa asutsü: Kejriwal

Patiala, January 11 (Agencies): Tanü Aam Aadmi Party (AAP) tongti, Arvind Kejriwal-i, Punjab nung party chief minister candidate ji state nungisa asutsü, ta metetdaktsü.
Punjab CM candidate ji Kejriwal asütsü südi ta bilema aliba mapang ka nung tanü pai iba ya sangdongogo.
Delhi Deputy Chief Minister, Manish Sisodia-i, nüburtemi Kejriwal CM kümdaktsütsü ta bilema vote agütsütsüla ta ayongzükba sülen anogo ka lir tanü Badshapur nung lokti senden ka nung jembidang Kejriwal-i, “Punjab chief minister ji state nungisa asutsü,” ta metetdaktsü.
Sisodia-i jembiba o nung ajemdaker SAD aser Congress party nati, AAP-i Punjab nung tangar ka Chief minister kümdaktsütsü meranger, ta aija liasü. Ajisüaka tanü Kejriwal-i, pa Delhi Chief minister sa inyaktsü, kechiyong yangji pa khuret tulu lir ta ashi.
Paisa, “Punjab chief minister ji shiba südir süaka, AAP-i nangzükbatem ajak inyaktsü ta ni nangzüker,” ta jangjatsü.
Punjab nung February 4 nü assembly election agitsü.
Deputy Chief Minister Sukhbir Singh Badal aija Kejriwal-i, yasüng Shiromani Akali Dal (SAD) Tir asemben saak, kechiyong taruba state Chief minister ji Kejriwal lir ta pai pungmang, ta ashi. Yashi Aam Aadmi Party-i, Kejriwal ji chief minister candidate asutsü ta sangdonga liasü.
Sisodia-i, “Arvind Kejriwal ji chief minister (Punjab) akumtsü ta bilema nenoki vote agüjang. Nü vote ji Kejriwal atema lir,” ta jembia liasü.
Paisa, sorkar tashii aruba sülen Kejriwal-i nangzükba ajak inyaktsü, ta nüburtem dang azüngashia liasü.
“Punjab Chief Minister ji shiba asütsü ta nüburtemi kü dang asüngdanger. Arvind Kejriwal ji Punjab CM asütsü ta nenoki amangtsüla,” ta paisa jembia liasü.