Punjab, Haryana, Chandigarh nung ghonda 3 cracker apoktsü melar

Chandigarh, October 13 (Agencies): Diwali benjung mapang nung Punjab, Haryana aser Chandigarh nung shidi agi yangluba bomb ‘firecrackers’ ghonda asem apoktsü High Court-i temelaba agütsüogo; item tesem asem nung Diwali aonung 6:30 ako nungi 9:30 ako tashi cracker apoktsü akok, ta High Court-i metetdaktsü.
Supreme Court-i Delhi temeket nung aliba state tem aser National Capital region (NCR) nung crackers ayoktsü mesüra apoktsü nokdangba sülen tanü High Court-i iba temelaba agütsü.
Crackers apokba ajanga mopung menenba tebilemtsü kaa tanü Punjab & Haryana High Court-i temzüng ishika yangluogo.
Ajisüaka division bench of justices- A K Mittal aser Amit Rawal nati, telatetbatemji taruba anogotem nung metetdaktsütsü, ta ashi.
“Court-isa, item temzüngji Punjab, Haryana aser Chandigarh nung taküm Diwali atema dang lir. Firecrackers ji aonung 6:30 nungi 9:30 ako tsüngda dang apoktsü akok,” ta metetdaktsü.
“Deputy commissioners, police commissioners aser senior superintendents of police dang item tetuyubaji shidak benoktsü atema metetdaktsüogo,” ta senior advocate, Anupam Gupta-i ashi.
Supreme Court-i November 1, 2017 nü tashi Delhi-NCR nung firecrackers mayoktsü aser mapoktsü atema tuyua lir.
High court bench-isa ketdangsertem dang firecrackers apokba ajanga mopung menenba osang agüjang ta teteyuba agüja iba maparen nung yariteptsü atema Gupta nem mapa nungloktsü.