Punjab nung Congress aser BJP lenir apu

Mohali, Monupi/May 20 (Agencies): Facebook nung suseta asüba, tangar dak akhaba aser tanga ozüng alema inyakba maparentem livestream asüba nguogo, kasaji police-i local lenir anati tena vote agütsüba video Facebook nung upload asüba atema puogo.
Police-i Congress lenir Rahul Kalia aser Mohali kübok Kurali municipal council Ward No. 3 Bharatiya Janata Party councilor, Bhanu Partap na puogo. Tenati Deobarnü election tatembangbuba phase nung vote agütsüba mapang Facebook Live nung video ka tangoka lemsatepba atema police-i apu, ta local media sangdong ajanga metetdaktsü.
Kalia-i, Sri Anandpur Sahib Constituency kübok Kharar segment booth number 150 nung pa vote agütsüba video ka Facebook Live nung update süa liasü.
Facebook nung video lemsatepba angazükba sülen police temi tena apu aser tena dang tamasa Facebook nung tena vote agütsüba video inoktsür aliba agintsü asoshi tetuyuba agütsü. Iba sülen Indian Penal Code (IPC), Representation of the People (RPA) Act nung section tapet kübok tena anema ken o benok.
Iba tatalokba osang agütsüba sülen Election Commission indang presiding officer Joginder Singh pa mapa nungi agin.