Punjab nung Dussehra amunger 50 tema menüngset

New Delhi, Mongputeni (October) 19 (Agencies): Hokolbarnü Amritsar anasa train kati Dussehra benjung amungertem nisung 50 shi menüngset aser ano aika yirutsü.
Joda Fatak level crossing nung Dusshera benjung temungdak nung lendongji atalok.
Train lenmang anasa Dussera amungertemi Ravan rongdokba repranga alidang lendongji atalok. Parnok train lenmang anatsülen noktaktepa liasü aser local train ka süidang parnok menüngset.
PM Modi-ia iba lendong atema temulung raksaba aser tasür kibongtem den mangyimba osang metetdaktsü. “Amritsar nung train lendong atalokba atema jashir. Iba lendong atema temulung raksar. Tasür kibong ajak den asükhu lemsateper aser yirua alirtem tekaratiba nung taneptsü angutsü sarasademtsür. Ketdangsertem dang tang nüngdakba teyari agütsütsü tetuyuba agütsüogo” ta Modi-i Twitter nung ashi.
Maneni, Home Minister Rajnath Singh-i Punjab Home Secretary aser DGP tem den jembiogo aser pai “Iba tejashi mapang Centre-i akokba tashi yaritsü renema lir” ta tena dang ashi.
Punjab Chief Minister Amarinder Singh-i rescue aser relief maparen reprangshimtsü atema tesem tonga ogo. State sorkari tasür kibong shia nem sen lakh 5 teyari agütsütsü aser yirua alirtem angati yaritsü osang metetdaktsüogo.