Punjab nungi nüngtugu kaketzülur 3-i Akademi award meyiptsür

Delhi/Chandigarh, October 11 (Agencies): Linük nung mepetmesü aser tamangba lokti balala tsüngda mepetmesü tensa adokba anema Deobar nü Punjab nungi nüngtugu kaketzülur asem- Gurbachan Bhullar, Ajmer Singh Aulakh aser Atamjit Singh nungeri Sahitya Akademi awards meyipa agütsütsü, ta sangdongogo.
Bhullar-i, “Tawa-tanü linük nung loktiliba nung mepetmesü adokdaktsütsü merangba kanga bulua kumdar, aser ibaji talisa shisaliok aser sobaliba na anema sentong tamajung asaba ajanga kü shisatsü minpronger,” ta ashi.
Arishi küm 78 kaketzülur Bhullar ya Punjab, Bathinda nungi lir aser 2005 küm pai züluba otsü tatsütem kaket “Agni Kalas” ajanga Sahitya Akademi award ngua liasü.
Ano Punjab nunger jilushi zülur nüngtugu, Aulakh-ia “kaketzülurtem, loktiliba ajungkettsü atema lenirtem amakba aser shisaliok den sobaliba nung Hindu tangatetba benokba kanga bulua akumer,” ta ashi.
Paisa, linük nung tamangba lokti tsüngda tensa raksadaktsütsü asoshi inyakbatem ajanga pa kanga jashir aser linük ya democratic aser secular ka süaka ketdangser ka ama Centre sorkari pei mapa meinyaker, ta ashi.
Tawa Dadri nung nashi shi achi ta tai tonglokja Muslim nunger arishi küm 50 tebur ka tepsetba aser Sahitya Akademi board züngsem aser kaketzülur M M Kalburgi tepsetba anema lungkak aitba temaitsü Hindi kaket zülur Uday Prakash, Nayantara Shegal, sangro zülur Ashok Vajpeyi, Kerala tsür kaketzülur, Sara Joseph, Urdu kaketzülur Rahman Abbas nungeria parnoki agizüka aliba award meyipa agütsüogo.
Malayalam sangro zülur K Satchidanandan-ia Akademi nung mapa toktsütsü sangdongogo aser otsü tatsü zülur P K Parakkadavu-ia Akademi züngsem toktsütsü sangdongogo.
Tanü Punjab nunger jilushir Atamjit Singh-i, “tesüiba ita ishika linük nung tamangba lokti tsüngda tesempatep dak sentakba tatalokbatem ajanga ni kanga jashir,” ta shiogo.